Troms og Finnmark er historie: – Vi kjem til å fortsette samarbeidet

– Vi takkar for eit godt samarbeid mellom Troms og Finnmark så langt. Og sjølv om vi no er formelt skilt i to fylke, kan vi sjå for oss at samarbeidet kjem til å fortsette. Spesielt innanfor sikkerheitspolitikken.

Det sa avtroppande fylkesordførar i Troms og Finnmark, Tarjei Jensen Bech frå talarstolen.

Det skjedde under det siste møtet i Troms og Finnmark fylkesting i Kirkenes tysdag ettermiddag.

Samanslått med tvang

Stortinget vedtok i 2017 å slå saman fleire fylke i Noreg. Og 1. januar 2020 så storfylket Troms og Finnmark dagens ljos.

Fleirtalet av politikarane i fylkestinget i Troms og Finnmark godtok aldri samanslåinga, og har hele tida arbeidd for å få ho snudd.

Senterpartiet gjekk i 2021 til val på å reversere det dei kalla for ei tvangssamanslåing. Og i dag var det to fylka formelt skilt.

– Det var ein del av folkeviljen, kanskje spesielt i Finnmark kor 87 prosent av folket sa nei til samanslåinga. Etter valet i 2019 hadde ikkje vi noko val. Vi går no kvar vår veg i ei ny tid, seier Jensen Bech.

Regjeringa har sett av rundt 800 millionar kroner til oppsplittinga av storfylka Troms og Finnmark, Viken, Vestfold og Telemark og Ålesund og Haram.

– Optimist

Fylkesordførar for nye Finnmark fylke, Hans-Jacob Bønå, erkjenner at han overtar ein del av skilsmisseboet han eigentleg ikkje ønska.

Men som han seier:

– Det trur eg går heilt greitt. No har det vore ein ryddig prosess, og eg trur vi har lagt ein grei føring for å kunne drifte Finnmark fornuftig framover, seier han.

– Dokker har jo hatt ein liten disputt om booppgjeret. Er dokker ferdige med det no?

– Ja, eg håpar det. Eg oppfattar ikkje at vi har noko splid og ueinighet no, seier Bønå.

– Betre samhald

Kristina Torbergsen, som blir fylkesordførar i Troms, trur og at dei fire åra i sambuarskap har knytt fylka tettare saman.

Og ho ser for seg mange gode diskusjonar om viktige felles tema i tida framover.

– Når vi i framtida skal diskutere helseberedskap, forsvar, totalberedskap, eller internasjonal samarbeid og vegprosjekt, så kan vi ta kvarandre i handa og seie at vi jobbar saman.

– Vi er ikkje ein trussel mot kvarandre. Tvert imot: Vi er ein styrke for kvarandre, seier ho.

Og ho legg til:

– Det finst kanskje ikkje så mange lukkelege skilsmisser. Men eg vil seie at denne er eit resultat av et ekteskap som ikkje så mange ville ha.