Nordmenn reiser mindre i sommar – Stor pågang på lokale ferietilbod

– Det er veldig fint å kunne vere her, når ein ikkje har noko anna å gjere i sommar, seier Vårinn (14).

Ho er ein av deltakarane på basketklubben Tromsø Storm sin basketcamp i sommar. Tilbodet har slått an, og den første veka er alle plassane fylte opp.

Saman med 60 andre barn får Vårinn basketballtrening gjennom sommaren – heilt gratis.

– Stadig fleire får dårlegare økonomi, og det er derfor eit stort behov for rimelege ferietilbod, seier Ida Amelie Mayes, offiser i Frelsesarmeen i Tromsø.

Endrar ferieplanar

Mayes påpeikar at kostnadene i samfunnet har gått opp, og at stadig fleire må endre vanane sine for å få kvardagen til å gå rundt økonomisk.

Dette påverkar ferieplanane. Ei undersøking gjennomført av Norstat viser at 72 prosent av Troms og Finnmark endrar reiseplanane sine i sommar på grunn av prisaukane.

Resten av landet er også sterk påverka, i hovudstaden seier nesten 1 av 2 at dei må avgrense ferieplanane.

At fleire blir heime skaper eit aukande press på dei lokale sommaraktivitetane. Dette merkar arrangørane godt.

– Vi har i alle fall fleire søkjarar enn vi har plass til, seier Monica Stenbakken, som leier Ferie for alle, eit ferietilbod frå Røde Kors.

Også Kirkens Bymisjon arrangerer ulike aktivitetstilbod i sommar, og har merka ein markant auke frå tidlegare år.

– I fjor hadde vi tredobla talet på barn som var med på aktivitetar. Eg trur nok folk kjenner på auka leveutgifter, seier Jenny Sjånes Johansen.

Skeivt røyndomsbilete

Mayes frå Frelsesarmeen meiner nordmenn har fått høgare forventningar til kva ein ferie skal innehalde, og at denne forventninga no kanskje er nøydd til å endrast.

Også Stenbakken ved Røde Kors meiner nordmenn er for dårlege til å nytte seg av dei tilboda dei har rundt seg.

– Vi skulle ønskje fleire norske familiar melde seg på aktivitetane våre. Vi veit at mange har behov for rimelegare alternativ, men kanskje er terskelen høgare i det norske samfunnet, seier Stenbakken.

Mayes påpeikar at det er mange frivillige organisasjonar og idrettslag som lagar gode, rimelege feriealternativ.

– Ein må leve etter evne. Det er absolutt mogleg å få gode sommaropplevingar der du bur.