Fleire stader i heile landet vart det måndag demonstrert for å vise solidaritet med helsepersonell i Gaza.
Lege og initiativtakar for demonstrasjonen i Tromsø, Oda Husebekk-Wiik, seier det er sjeldan at heile Helse-Noreg samlar seg på denne måten.
Ho meiner det er rett å støtte helsepersonellet i Gaza.
– Me skuldar kollegaene våre å holda håpet oppe. Eg trur me alle kjenner på ei desperat håpløyse i den situasjonen me står i. Me får dagleg oppdateringar frå kollegaene våre og ser kor forferdeleg det som skjer i Gaza er, seier ho.
Markeringane rundt om i landet vart støtta av Den norske legeforeining, Leger Utan Grenser, Norsk Sykepleierforbund og andre helseorganisasjonar.
Gilbert med frå Egypt
Ein av dei som deltok i Tromsø, var Marthe Nissen. Ho er tillitsvalt i Yngre legars foreining ved UNN.
Ho seier at det er det kjenst naturleg å stå opp for kollegaene sine.
– Me kjenner på urettferda som kollegaene våre i Gaza blir utsette for. Helsepersonell skal aldri vera målskiver, same kvar ein konflikt går føre seg, seier ho.
Lege Mads Gilbert var blant talarane på aksjonen i Tromsø. Han har i 12 veker vore i Kairo og prøvd å komma seg inn i Gaza.
Gilbert var sjølv ikkje fysisk til stades, men heldt ein appell via telefon.
Han meiner at det å ikkje engasjere seg, er det same som å ta side med de som står bak angrepa.
– Helsevesenet er på mange måtar øydelagt av bombing, mangel på utstyr, drivstoff, mat og medisinar. Likevel jobbast det døgnet rundt for å ta hand om dei skadde. Eg blir imponert over at dei ikkje bryt saman.
– Rører oss ekstra sterkt
Også leiar i Troms legeforeining, Jo-Endre Midtbu, heldt appell for dei frammøtte.
– Me ser at helsepersonell blir angripe og at sjukehus er bomba. Det rører ved oss som jobbar i det tryggaste helsevesenet i verda ekstra sterkt, seier han til NRK.