– Elgen er eit stort dyr med eit stort skadepotensial. I verste tilfelle kan det gå liv. Senk farten og vêr obs når du er ute og køyrer.
Det seier Jan Hansen, medlem i viltnemnda og ettersøkteamet i Nesseby kommune i Finnmark.
Jan Hansen, medlem i viltnemnda og ettersøkteamet i Nesseby, åtvarar om farleg mykje elg langs vegane.
Foto: Jan Hansen / Jan HansenIfølgje Hansen er det no ekstremt mykje elg fleire stader i Aust-Finnmark. Det har vore fleire ulykker mellom elg og bilar den siste tida.
Og over nokre timar tysdag var det ikkje mindre enn to elgpåkøyrslar i Nesseby. I det eine tilfellet hamna bilen i grøfta. Det er ikkje meldt om personskadar.
– Spesielt frå Varangerbotn til Bramsletta i Nesseby er det vanvitig mykje elg som oppheld seg nær E6. Der er det så mykje elg at der kan vere direkte farleg å køyre.
– No ser me at det også er observert mykje elg langs E75 frå Varangerbotn i retning Vadsø. Så vêr forsiktig. Følg med om det er elgspor langs vegen. Ser du det, bør du setje ned farten, seier Hansen.
Og han legg til:
– Med høge brøytarkantar er det vanskelegare å sjå han før han stormar ut på vegen. Då kan det truleg vere for seint, åtvarar han.
Trekkjer til bygda
Rolf Rødven er forskar og tidlegare prosjektleiar for Elg i Finnmark, som vart avslutta i 2021.
At det er mykje elg i Finnmark for tida, er ikkje unikt, seier han.
– 60–70 prosent av elgane trekkjer mellom sommarbeite og vinterbeite. Og Nesseby er eit hotspott om vinteren. Det me såg i samband med prosjektet, var at elgen trekkjer til Vesterelvmyra i byrjinga av desember. Og der står han heilt fram til mai. Då spesielt i samband med snørike vintrar, seier Rødven.
Rolf Rødven, forskar og tidlegare prosjektleiar i Elg i Finnmark, seier at forholda akkurat no ligg til rette for mykje elg langs vegen i Finnmark. – Elgen er akkurat som oss. Den liker ikkje å vassa til livet i snøen, seier han.
Foto: Bård Wormdal / NRK– Kvifor skjer dette spesielt når det er snørike vintrar?
– Elgen er akkurat som oss. Han likar ikkje å vasse til livet i snø. Me ser at dei gjerne bruker vegar, skuteløyper og lysløyper når det blir mykje snø. Då for å spare energi.
– Noko anna me såg i undersøkinga, er at det er ein del dyr som kryssar vegen mange gonger kvar einaste dag.
Og som Hansen, ber Rødven folk som ferdast langs vegane i Finnmark om å vera merksame.
– Sidan elgen har lange bein, tek det ofte ikkje meir enn eit par steg så er han både på og over vegen. Så når han først kjem har du veldig kort tid på å respondere og reagere, seier Rødven.
