Måndag sette 128 amerikanske fallskjermjegerar seg på eit fly i Alaska.
Målet var Indre Troms, der dei skulle hoppe av flyet over Takvatnet.
Øvinga kallar de Arctic Shock, og målet er å kunne deployere militære styrkar frå éin stad i verda til eit anna på kort varsel.
– Vi verdset moglegheita til å samarbeide med forbundsfellane våre i det norske Forsvaret og å lære avansert krigføring i kaldt klima samtidig som vi kan vise den aukande arktiske kunnskapen vår, seier general Brian Eifler i 11th Airborne Division i ei pressemelding.
Med på hoppet var også ein norsk soldat som til vanleg jobbar i 2. bataljon i Brigade Nord. Soldatane hoppa av på eit islagt vatn, kort veg frå arbeidsplassen til Mathias Navelsaker.
– Det er ikkje vanleg kost å få lov til å dra til Alaska, trene med amerikanarar, få sette seg på eit fly i ein annan verdsdel, fly over Nordpolen og såg hoppe ut rett ved sida av sin eigen leir, sa han til Folkebladet etter hoppet.
– Maktdemonstrasjon
Brigadesjef Terje Bruøygard var også til stades ved Takvatnet, og kallar øvinga ein maktdemonstrasjon.
– Det viser norske og amerikanske borgarar, militære og politikarar kva vi kan gjere saman, og det viser NATO-alliansen og potensielle fiendar kva vi kan gjere saman, seier han til Nye Troms.
Han forklarer vidare at hovudoppgåva til 11th Airborne Division er å bringe store landsstyrkar hurtig inn i eit innsettingsområde for å avspenne, skremme og trappe ned eller bygge opp forsvarsevne.
- Bruøygard er elles sjef i brigaden prinsesse Ingrid Alexandra tenestegjer i. Ho er nå ferdig med rekruttperioden, og skal tenestegjere i Ingeniørbataljonen resten av året.