Over 50 år sidan første konsert i Nord-Noreg – ser ikkje bort frå fleire neste år

52 år etter Åge Aleksandersen for første gong heldt konsert i Nord-Noregs tredje største by – Harstad – vende han fredag kveld tilbake til byen.

Da han fredag ettermiddag hadde landa på Evenes, og hadde tatt fatt på dei 45 kilometrane inn til hotellet i byen, mimra han tilbake.

– Eg blei sittande og tenke på at eg spelte i Harstad for første gong i 1972. Eg har sikkert vore i Harstad og spelt kanskje 20–30 gonger i løpet av den lange perioden, sa Aleksandersen til NRK, berre timar før han skulle på scena.

Trivst i Nord-Noreg

Trønderrockaren, som i fjor haust kunngjorde at turnélivet med «Sambandet» blir historie, skryter av publikumma i byen.

– Harstad, alltid suverent, flott publikum, og ikkje minst det som har skjedd med Bakgården og festivalen, som er veldig fine greier, seier han, og skryter av mottakinga i Nord-Noreg.

– Eg spelte ein gong i eit velstrigla popband frå Namsos som heitte Prudence, og vi fekk ikkje spele stort sett andre plassar enn i Nord-Noreg. Vi spelte i Mosjøen, Mo i Rana, Fauske, Bodø, Narvik, Harstad og Tromsø.

Da Åge Aleksandersen og Sambandet seint fredag kveld entra scena på festivalen Bakgården i Harstad, var dette for aller siste gong i byen.

Sjølv set 75-åringen stor pris på arenaen, som er ein parkeringsplass midt i byen.

– Vi speler uansett for dei som er der, enten det er fem eller ti tusen. Det er mykje positivt med eit sånt område når det er såpass innramma, både lydmessig og visuelt, så er arbeidsforholda optimale.

Kjem tilbake

Det var i september i fjor Åge kunngjorde at turnékarrieren med Sambandet går mot slutten. Seinare blei det kjent at avslutningskonserten skulle haldast på Lerkendal.

Ein konsert blei til to, som igjen blei til ikkje mindre enn tre utselde konsertar på Lerkendal.

Sjølv om konserten fredag var den siste i Nord-Noreg med turneen «Takk for oss!», vil ikkje Åge utelukka fleire turar til landsdelen.

– Nei, det er det ikkje. Vi har eitt år igjen, men den turen vi nå er ute på er da den siste turen med det som heiter Åge og Sambandet. Eg, Gunnar Pedersen og Trondheimsolistene har eit akustisk prosjekt som vi kjem til å halde fram med. Men 90 prosent av turnéverksemda mi er ferdig neste haust.

Sjølv om neste års rute framleis ikkje er heilt klar, kunne trønderrockaren røpe at han planlegg nokon turar til Nord-Noreg allereie neste år.

– Eg reknar med at det blir ein tur til både Tromsø og Bodø viss eg ikkje tar feil.