Abdusattorov er frå Usbekistan, og på grunn av kronglete flysamband og pandemi har han dei siste åra teke store steg gjennom spel på internett.
Med nettsjakken har juks i sjakk vakse seg stor som ei vondarta cyste. Tidlegare i haust er det avslørt omfattande juks både på topp- og botn-nivå i sjakken.
– Det er eit stort problem, og tiltaka for å hindre det bør vere strenge. Problemet kjem til å bli større og større, fordi juks er veldig lett, seier Abdusattorov til NRK.
Juks-oppvask
Ifølgje chess.com er fire av dei 100 beste sjakkspelarane i verda teke i juks. Det kom fram i Niemann-rapporten utarbeidd av den største sjakknettstaden i verda.
Sidan Abdusattorov har spelt mykje på internett, har han møtt mange spelarar på feil side av regelverket.
– Eg har møtt mange juksarar online. Eg kan sjå det på trekka deira, fortel han.
Han seier det er rimeleg lett å avsløre, særleg når han møter ukjende spelarar som speler ekstraordinært.
– På nett er det vanskeleg å sjå om spelaren er rein. Sjølv stormeistrar er ikkje alltid reine, seier han.
– Eg har vorte juksa mot i eit langsjakkparti, og veit korleis det kjennest. Det er ikkje bra, så eg håpar dette er bra for sjakken i lengda, seier Hjörvar Steinn Gretarsson.
Blir samanlikna med kvelarslange
Så langt i VM har usbekiske Nodirbek Abdusattorov feia motstanden av brettet. Med ti av tolv poeng i gruppespelet var han suverent best av dei åtte VM-deltakarane.
– Eg trudde ikkje han var så sterk, seier regjerande verdsmeister Wesley So.
Abdusattorov vart oppdaga tidleg av russiske Dmitrij Kajumov, ein erfaren trenar frå Russland. Kajumov var raus med rosen då han beskreiv unge Abdusattorov til media i heimlandet:
– Gjennom 40 år som trenar i ulike land har eg sett mange stormeistrar, men eg har aldri sett eit talent som han, sa Kajumov.
Den tidlegare trenaren døydde i fjor, men før han døydde garanterte han at Abdusattorov kom til å bli verdsmeister.
– Merk mine ord, sa han.
Då usbekaren vann VM i hurtigsjakk på nyåret måtte sjakkpressa i verda hente fram superlativa.
– Han spesialiserer seg på å seigpine motstandarane og minner meg om legenda Anatolij Karpov, skreiv amerikanske John B Henderson.
Indiske Express døypte han til «kongeboaen som kveler motstandarane».
Passerte magisk grense
Sjølv er usbekaren avmålt om eigen karriere, men sakte har han teke steg nærare verdstoppen. No er han rangert som nummer 31 i verda, og nummer fire som junior. Etter tre år «i stampe» tok han nyleg eit stort steg mot verdstoppen.
No er han ein «2700-spelar», ein spelar med over 2700 i rating.
– Endeleg!, seier Abdusattorov.
Dermed håpar han å fokusere på å nå neste draumegrense, framfor å avsløre juksemakarar på nett.
– Eg er veldig optimistisk på vegen vidare, og no skal eg gjere mitt beste for å nå 2800, seier Abdusattorov til NRK.