Trur på nye islandske mirakel i EM

– Ein har alltid trua på dei uansett kven dei spelar mot. Det islandske laget er godt nok til å slå kven som helst.

Siggi Eyjolfsson er heilt klar i si tale. Saman med Runar Kristinsson som står med flest landskampar for øynasjonen, trenar han Lillestrøm.

I går kveld kunne trenarduoen på Romerike sjå at landslaget deira tok det eine poenget dei trengte, og kunne juble for å vere eitt av fire lag som allereie er klare for EM i Frankrike.

Det er ingen tilfeldigheit.

Betre enn Noreg på tidleg spelarutvikling

– Me er det fyrste landet som slår Nederland både borte og heime. Ein må verkeleg vere eit godt lag for å klare det. Det er ingen tilfeldigheit at me har kvalifisert oss til EM, seier Kristinsson.

Grunnane er mange til at det akkurat er dette laget som kvalifiserer landet med berre 50.000 fleire innbyggarar enn Bergen by, til sitt fyrste sluttspel. Før Eyjolfsson blei LSKs assistenttrenar kom han frå sju år i det islandske fotballforbundet som både landslagstrenar for kvinnene og utviklingssjef. Der har han fylgd dagens islandske heltar tett.

– Me har brukt 10-15 år på å byggje opp dette laget. Mange av desse spelarane reiste til utlandet då dei var 16-17 år og fekk verdifull erfaring der. Men ein kan ikkje nå langt i fotball utan å ha gode tekniske ferdigheiter. I alderen 8 til 12 år er Island betre på spelarutvikling enn Noreg, meiner Eyjolfsson som meiner spelarutviklinga på det alderstrinnet er meir tilfeldig i Noreg.

– Lars Lagerbäck skal også ha mykje av æra. Island kunne aldri hatt Guordiola som trenar. Dei må ha eit bra forsvar og god organisering. Der har Lagerbäck passa perfekt.

– I tillegg er dette den fyrste generasjonen som har kunne trent fotball heile året. Då me var unge sprang me rundt i snøen heile vinteren, legg Kristinsson til.

– Heilt spesielt

No ventar to betydningslause kampar i EM-kvalifiseringa før Island kan begynne å førebu seg til sitt fyrste meisterskap og trenar Lagerbäcks sjuande. Men denne gongen er spesiell.

– Det har vore fantastisk kvar gong eg har vore i sluttspel. Men dette kjennes spesielt, eg føler verkeleg støtten og varmen frå folket. No kan me berre nyte at me er klare. Eg har ikkje ord, sa svensken etter kampen i går.

Heime på Rælingen utanfor Lillestrøm ser trenarane på bilete og videoar av feirande islendingar.

– Dei kjem til å feire heile veka. Det kjem til å bli eit stort problem for alle islandske verksemder, ler Eyjolfsson.

Lillestrøm-trenarane trur Island langt frå blir ein kasteball i Frankrike neste sommar.

– Normalt går ein til sitt fyrste meisterskap for å få erfaring, men me har eit godt nok lag til å gjere meir enn berre å delta, meiner Kristinsson.