Djupt inne i overtida sørgde Fredrik Gulbrandsen for at Molde vann 2–1 over Club Brugge førre veke. Dermed lever også håpet om avansement i aller høgaste grad før returoppgjeret i Molde torsdag kveld.
Og akkurat Gulbrandsen har dei siste kampane vist seg som ein nøkkelspelar for Erling Moes lag.
I cupfinalen i desember i fjor avgjorde han kort tid før slutt mot Bodø/Glimt. I 2024 har det blitt fem mål på berre tre kampar i Serieligaen, etter to mål både heime og borte mot Legia Warszawa og den nemnde skåringa mot Club Brugge.
Med fem mål er Gulbrandsen den spelaren med flest mål i alle europacupane til no i 2024. Nærast følger Pierre-Emerick Aubameyang, som har skåra fire mål på tre kampar i Europaligaen for Marseille i år.
– Gulbrandsen har vore ei draumesignering for Molde heilt sidan han kom. Han har vore heilt avgjerande nå i fleire viktige kampar, seier NRKs fotballekspert Kristoffer Løkberg.
KLAR TIL DYST: Fredrik Gulbrandsen under Moldes trening i Brugge onsdag.
Foto: Remi Sagen / NRKNær døden i Tyrkia
For etter åtte år i utlandet, vende Gulbrandsen heim til Noreg i fjor sommar. Til slutt enda han opp i gamleklubben Molde, der han også spelte i 2013 til 2016.
Blant årsakene til at han kom heim var jordskjelvet han opplevde i Tyrkia 6. februar i fjor.
Gulbrandsen var ute med skade og var heime i leilegheita i 14. etasje i Adana da jordskjelvet ramma midt på natta og leilegheitsblokka begynte å svinge.
Over 50.000 døydde som følge av jordskjelvet. På veg ut av bygget frykta Gulbrandsen at bygningen skulle kollapse og at han skulle døy.
Nordmannen har tidlegare forklart til Romsdals Budstikke korleis han gjennom Lillestrøm i fjor kom kontakt med ein psykolog som hjelpte han med å komme tilbake på topp etter jordskjelvet.
– Vi gjekk gjennom traumet eg hadde vore gjennom. Eg sleit med å sove ein periode, og vakna med ei kjensle av at bygningen rørte på seg og rista. Det var litt panikk i starten, men det hjelpte veldig å snakke med psykologen, sa Gulbrandsen til avisa i fjor haust.
Han snakka igjen om korleis jordskjelvet hadde påverka han i vekas episode av Mush Hour, podkasten til tidlegare lagkompis Mushaga Bakenga.
– Eg har jo jobba med det. Eg har vore hos psykolog og prata om det, for det var ganske tøft i starten. Eg var 100 prosent sikker på at eg skulle døy da eg var oppe der, sa han.
– Når eg forklarer det, så kjenner eg ikkje at folk forstår kor sjukt det er. Eg var hundre prosent sikker på at bygningen berre skulle rase, sa han vidare om jordskjelvet.
STORE ØYDELEGGINGAR: Fleire bygningar i Adana var øydelagde etter jordskjelvet.
Foto: Reuters– Fekk verkeleg støkken i seg
Effekten av å komme heim til Noreg trur Molde-trenar Erling Moe har hjelpt for Gulbrandsen.
– Eg trur at når livet smiler utanfor banen, med barn og at han trivst i kvardagen, så er det eit viktig aspekt når du skal prestere ute på banen. Dei to tinga trur eg heng saman, seier Moe.
Trenaren beskriv at Gulbrandsen fekk ei tøff avslutning på tida i Tyrkia.
– Han fekk verkeleg støkken i seg (etter jordskjelvet). Eg trur han hadde ein svolt og ei lyst til å komme heim og vise at han framleis kunne, seier trenaren vidare.
Moe legg til:
– Så langt, så bra. Så vil eg igjen påpeike at det er i kollektivet at individ skin. Så lenge vi klarer å hugse det, så kjem det til å gå bra for oss, seier han med eit smil.
– Kva har Fredrik Gulbrandsen tilført dette laget og kva forventa de eigentleg av han da han kom tilbake til Noreg?
– Det var vel dette eg forventa. Eg må kunne vere så kjekk og seie det, for vi kjente jo Fredrik godt frå før. Vi syntest han passet bra inn saman med dei andre vi har her. Det er klart det er lettare å vere god viss du er i eit lag som speler deg god, seier Moe.
Kampen i Brugge torsdag startar kl. 21.00. Den kan du høyre på radio på NRK Sport. Kampen blir også send på TV på Vsport1.
