Sjekk den uvanlege ekstrajobben til landslags-kometen

– Eg har med meg alle teiknesakene, seier Eckhoff og bryt ut i latter.

I Hege Riises første landslagstropp er det ei rekkje debutantar. Ein av dei er Eskilstuna-spelaren Noor Eckhoff, som i fleire sesongar har herja i Toppserien, Damallsvenskan og aldersbestemde landslag.

Men 22-åringen har også fått seg eit kjent namn i andre krinsar. Eckhoff har nemleg laga teikneseriar sidan ho var seks år, og publiserer sine eigne teikneseriestriper i bladet Storefri.

Medan andre landslagsspelarar kanskje koplar av med TV-seriar og filmar på samling, sit midtbanespelaren i mørket og teiknar i det stille.

– Det blir nokre timar på hotellrommet der eg sit og teiknar – og drodlar idear. Eg får òg mykje inspirasjon av å vere på samling, som ein kan lage nye humorstriper av, seier Eckhoff.

– Er det nokre spesielle lagvenninner du lèt deg inspirere av?

– Haha, nei, det er ingen spesielle typar. Men eg kan hente ulike personlegdomstrekk som eg synest er fascinerande eller morosame frå andre – utan at eg lagar ein blåkopi av spelarane, humrar ho.

Kjenner seg igjen i teiknestripene

I tillegg til å publisere stripene sine i Storefri, legg Eskilstuna-profilen ut teikningane sine på Instagram-profilen «Noor_Striper». Her blir ho følgt av fleire landslagsvenninner.

– Noor er veldig flink og kreativ. Det er morosamt, seier Emilie Joramo og legg til:

– Teikningane hennar er veldig attkjennande.

Eckhoff fortel at ho har fått god respons frå fotballmiljøet. 22-åringen hentar mykje inspirasjonen frå fotballverda og livet som kvinneleg fotballspelar når ho teiknar.

– Det eg set høgast er når andre spelarar seier at dei òg kjenner seg igjen. Det synest eg er kult, seier ho.

– Teikning er meditativt

Landslagssjef Hege Riise har òg fått med seg teikneseriestripene til debutanten. Ho tykkjer det er positivt at midtbanespelaren bruker timane utanfor fotballbana ved teiknebrettet.

– Når ein er proff, så har ein ganske mykje tid mellom treningar, og viss alt anna er optimalt med kosthald, søvn og sånt, er det fint å tenkje på noko anna, seier Riise.

Hovudpersonen sjølv fortel at hobbyen har vore heilt avgjerande for fotballkarrieren. Når ho har blyanten i handa, fell pulsen.

– Det er litt meditativt. Viss det har vore ei svak trening, eller ein kamp som ein ikkje er så fornøgd med, er det fint å komme heim å få hovudet på andre ting. For meg har det vore veldig viktig. Eg er glad eg har fotball og teikning. Dei passar så bra saman, seier ho.

– Hjelper det deg som fotballspelar?

– Utan tvil. Som sagt ein kan berre slappe heilt av. Kople av. Eg trur utan tvil at det gagnar meg veldig på fotballbana.

Fredag kveld møter Eckhoff og dei norske damene Belgia på bortebane. Kampen ser du på NRK frå klokka 20.30.