Noregs EM-kvalifisering starta med ei vakker og iskald skåring mot Finland frå Tottenham-spelar Celin Bizet Ildhusøy.
22-åringen har også fått stor merksemd for eitt av sesongens vakraste mål i England.
Men det er ikkje «nerding» av fotball framfor TV-skjermen som har gjort henne god.
Snarare tvert imot.
– Eg ser aldri fotball, eigentleg.
– Kvifor ikkje?
– Eg veit ikkje kvifor. Det berre har liksom ikkje gitt meg... Kanskje eg synest det er nok med å spele, seier Ildhusøy.
– Utradisjonelt å seie så tydeleg
Så når Erling Braut Haaland pøser inn mål for Manchester City eller Caroline Graham Hansen briljerer for Barcelona sit ikkje Ildhusøy benka framfor skjermen.
Lagvenninne Cecilie Fiskerstrand trur Ildhusøy høyrer til fåtalet av toppfotballspelarar som ikkje interesserer seg for å sjå kampar.
– Ja, det trur eg, og i alle fall er det kanskje utradisjonelt å seie det så tydeleg, seier ho til NRK.
– Nokon spelarar vil sjå kvar einaste kamp. Andre vil ikkje sjå på fotball, men berre spele. Celin er veldig fokusert på detaljane når vi spelar, så eg kan forstå kvifor ho vil bruke fritida til å koble av. Det hjelp ho til å vere på sitt beste, seier landslagssjef Gemma Grainger.
Ildhusøy er i det minste ikkje aleine om å vekke oppsikt for manglande iver for å sjå TV-kampar.
– Eg ser eigentleg ikkje så mykje fotball, sa Gareth Bale til ESPN i 2018.
– Eg har aldri vore fanatisk etter å sjå kampar, sa Carlos Tevez til magasinet Clarin.
– Eg ser høgdepunkt, men liker ikkje å sjå 90 minutt, sa Ronaldinho til Ibai Llanos i 2021.
– Må ikke elske fotball
NRKs fotballekspert Carl Erik Torp ser eit mønster i trioen Bale, Tevez og Ronaldinho - og ser Ildhusøy som ein lignende type. Det er artistar som gjør ting på egen måte, med en friere innstilling til fotballivet.
Han har sjølv spelt med gode spelarar, men som ikkje nødvendigvis brukte fritida framfor skjermen. Torp meiner imidlertid at det kan vere ein fordel å følge med på annan fotball enn den ein speler sjølv.
– Eg trur på generelt grunnlag at det å ha ei gjup interesse for fotball utanfor eigen aktivitet, er med å gje betre innsikt og forståing. Ser ein fotball, forstår ein meir fotball. Men det handlar om å vere best ut i frå eigne føresetnaer. Så for nokre kan det vere lurt å ta eit steg tilbake, seier han.´
Torp tenker at kapteinar, spelarar som «er hjernen i laget», og dei med ambisjonar om ein jobb i fotballen etter spelarkarrieren, meir naturleg har interesse for fotball også på fritida.
– Det er ikkje nødvendigvis slik at ein må elske fotball for å spele fotball, seier eksperten.
Slåsting og raske bilar
Der fleire store fotballstjerner seier at dei heller koplar av med å sjå golf enn fotball, koplar Ildhusøy av med å sjå TV-seriar og filmar.
– Eg har andre ting å sjå på.
– Kva andre ting?
– Netflix. Alt mogleg rart, seier Ildhusøy og bekreftar at ho liker action, slåsting og raske bilar.
Ho trur ikkje det medfølger store ulemper å ikkje sjå potensielle motstandarar spele fotball.
– Eg bryr meg ikkje så mykje om kven eg speler mot, eigentleg. Eg tenker aldri på om ein spelar er sånn eller sånn. Eg må berre gi mitt beste uansett. Og prøver å ikkje sette meg så mykje inn i motstandaren, eigentleg.
Ho understrekar at drivkrafta for å spele fotball og vinne kampar er svært høg.
– Eg vil vinne alt. Og eg tenker litt sånn at «Det eg trur på, det skjer», seier Ildhusøy.
Men ho vil ikkje seie om ho har fått ekstra trua på at Noreg kan slå gruppefavoritt Nederland etter at Nederland tapte for Italia i første EM-kvalifiseringskamp.
– Eg trur ikkje det har så mykje å seie kven som taper eller vinn mot kvarandre. Nederland blir tøft uansett, seier Ildhusøy.