Vi møter Harald Frey i hallen på Engebråten, der basket-eventyret starta. Han viser fram sine ferdigheiter med ballen i henda, og skårar poeng etter poeng, frå bak tre-poengstreken, og heilt fram til kurva.
Akkurat slik han har gjort gjennom sine fire år i college-basketballserien for Montana State Bobcats.
Harald Frey viser fram pasningshanda si, som har levert 514 assist på fire år i USA. Søster Anniken Frey, som også spelar college-basketball, ser på.
Foto: Eskil Wie Furunes / NRKFor det å skåre poeng er ikkje nytt for Frey. Bere elleve spelarar har skåra fleire poeng enn han i Big Sky Conference, Bobcats si avdeling, gjennom tidene.
Han er også berre den andre spelaren som nokon gong når både 1800 poeng og 500 assist i avdelinga, den første sidan 1978.
– Det er ting eg ikkje drøymde om før eg kom inn dit. Eg prøvde berre å komme inn, få speletid og vere på eit lag som vinn. Det har gått over all forventning, seier Frey til NRK.
I tillegg til dette gjekk Frey også viralt då han avgjorde kampen mot University of North Carolina Greensboro i siste sekund med eit skot frå eigen banehalvdel.
Norsk nasjonalsong
Kor høgt verdsett nordmannen er i klubben, fekk man ein peikepinn på i hans siste kamp for laget.
Den siste heimekampen for sesongen blir kalla «senior-night», og er ein kveld der skulens avgangselevar blir anerkjent. Og for Frey blei årets «senior-night» ein minneverdig kveld.
Rundt i heile hallen var det hengt opp norske flagg, fortel Frey, og like før kampstart fekk han seg endå ei overrasking.
SIKKER: Harald Frey er vanlegvis sikker frå straffekast-linja, med nesten ni av ti treff i seriespel for Montana State Bobcats. Her frå ein kamp mot Montana Grizzlies.
Foto: Jack Murrey– Før kvar kamp pleier dei å spele den amerikanske nasjonalsongen. Men rett før denne kampen spelte dei den norske. Det var ganske sterkt, og noko eg kjem til å hugse veldig, veldig lenge.
Laget hans var også på veg mot å gjere noko stort denne sesongen. Dei var i kvartfinalen i seriesluttspelet, og kunne skimte sjansen til å spele i det som i USA blir kalla March Madness, ein månad full med sluttspel for college-basketballserien, der berre dei beste klubbane møtast.
– Det er den største sportshendinga i USA. Då stoppar heile USA opp i ein månad og føl med på kampane. Det var ein sjanse vi hadde til å spele framfor dei beste NBA-klubbane, og framfor heile USA, fortel Frey.
Men på grunn av virusutbrotet blei all college-basketball avlyst for sesongen, og Frey gjekk glipp av ein moglegheit til å vise seg fram i eit stort utstillingsvindauge som denne turneringa er.
Draumen om profflivet
Det er heller ikkje det einaste utstillingsvindauget viruset har satt ein stoppar for denne sesongen.
Kvar sommar blir det arrangert Summer League, ei turnering der spelarar kan få moglegheita til å vise seg fram for NBA-klubbane. Men denne blir det ikkje noko av i år.
– Det er trist. Summer League var eitt av mine mål for sesongen. Det er eit bra utstillingsvindauge, der du spelar mot dei aller beste, unge spelarane. Men det er Summer League igjen neste år, så då får eg berre jobbe vidare, og kanskje eg drar då, seier Frey.
DUNK: Harald Frey viser fram dunken sin på heimlege trakter, etter fire år på college i USA.
Foto: Eskil Wie Furunes / NRKFrey er for augneblinken klubblaus, etter at hans college-karriere no er avslutta. Men det vil nok ikkje ta lang tid før han er tilbake på bana i nye draktfarger, anten i ein europeisk klubb, eller kanskje tilbake i USA.
Det han no fokuserer på, er å halde seg i form, og vere klar til å gripe dei sjansane som måtte oppstå.
Og dersom han gjer det, er hovudpersonen sjølv klar på at han kan bli den første nordmannen i NBA sidan Torgeir Bryn spelte for LA Clippers i 1989-1990-sesongen.
– Ja, eg meiner det. Eg kjem alltid til å «bette» på meg sjølv. Som eg har sagt til min familie og venar: du treng ikkje at alle 30 laga likar deg, du treng berre eitt lag. Ein situasjon som er riktig for deg, og det er det eg jobbar for.
