OL-klare Sunniva (19) blei hetsa for teknikken: – Blir heilt sjokkert

«No må du vakne. Dette er for dårleg. Begynn på skolen igjen! Boksing er ikkje noko å satse på viss du ikkje skjønner at slik du boksar nå ikkje når fram»

– Når eg høyrer det igjen nå, så blir eg heilt sjokkert, seier Sunniva Hofstad til NRK.

Denne er blant fleire kritiske meldingar 19-åringen fortel at ho og trenaren har fått på vegen fram til den historiske prestasjonen hennar.

I sommar blir Hofstad ein av 125 kvinnelege boksarar i OL i Paris. Dermed blir ho den første norske kvinnelege boksaren i OL etter at greina kom på OL-programmet i 2012.

Da vankar det ros frå proffboksar Cecilia Brækhus.

– Ho har eit stort talent, men nesten enda viktigare er det at ho har forståinga for arbeidet som må leggast ned, og tolmodet og vilje til å følge det opp, seier Brækhus til NRK.

Blir kritisert for teknikken

Men Hofstad har merka at det er ikkje alle som liker det ho driv med. Ho får tyn for måten ho boksar på.

Ho og trenaren fortel om fleire kritiske meldingar:

«Du kjem ingen veg viss du ikkje løftar hendene».

«Sunniva var god som junior, men som senior så må ho ha hendene opp».

– Det er jo klart at sånne kommentarar kan bli litt sånn: «hmm, ja, bør eg vakne, er det her for dårleg?», seier Hofstad.

Bakgrunnen er Hofstads bokseteknikk. For i bokseringen lèt ho ofte armane henge lågt og ikkje vere oppe i forsvarsposisjon ved ansiktet, ein såkalla «guard». Det er det ho får kritikk for.

Frå Brækhus får Hofstad derimot støtte.

– Det går heilt fint å bokse med hendene ned i amatørboksing der hanskar og hjelm er tjukke. Du må sjølvsagt ha gode refleksar og vere komfortabel med det. Det trur eg ikkje vil vere eit problem. Sunniva viser gong på gong at ho kan meistre det, seier ho.

Folk får seie det dei vil

– Det er mange som har sagt at ho må få opp hendene, seier trenar Ole-Arne Næsgård, som har vore Hofstad trenar sidan 2019.

Han fortel om fleire meldingar av same sort.

– Det har vore litt sånn «æææh, vær så snill da». Eg har tenkt nå skal vi «bætre dæ» vise dei. Så det var litt godt det òg, da, eg må innrømme det, seier Næsgård om da dei greidde å kvalifisere seg til OL, og fortset:

– Det er nokre trenarar som har vore i kommentarfelta og skrive at «nå må de få hendene opp». Både i innboksen vår og i opne kommentarfelt.

Sjølv meiner Hofstad at ho er i flyten når ho boksar med hendene ned.

– Blikket blir betre. Alle vurderingane mine blir på mange måtar betre. Når eg boksar med hendene opp så blir eg ofte «andreboksar». Eg kjenner eg ikkje rekk fram og at eg bommar og blir treft, seier Hofsad.

– Folk får seie det dei vil. Fordi eg veit fasiten for meg sjølv i alle fall. Og nå har dei vel eit litt anna perspektiv når eg har kvalifisert meg til OL med hendene ned, seier ho og smiler lurt.

Første gong sidan 1996

Saman med 25 år gamle Omar Shiha skal Hofstad altså forsvare Noregs ære i bokseringen i Paris. Det er første gong sidan 1996 at nokon med norsk pass boksar i eit OL.

OL-deltakinga gleder Cecilia Brækhus.

– Det er stort og eit skikkeleg løft for bokseforbundet og boksing generelt i Noreg. Eg både håpar og trur det vil gi ein auke i rekruttering til idretten, seier ho.

Da ho sjølv var amatørboksar, drøymde ho òg om OL, men den gong fekk ikkje kvinnelege boksarar delta.

– Først var medisinske grunnar argumentet for å hindre jenter i å delta. Da dei argumenta sjølvsagt ikkje heldt vatn blei vi fortalde at jenter ikkje var gode nok, seier ho og fortset:

– Det var sjølvsagt eit gap mellom kvinneboksing og herreboksing, men så fort OL blei lov for jenter eksploderte sjølvsagt rekrutteringa. I tillegg til at ressursar og midlar fann vegen til kvinneboksing.