– EM går jo allereie tidleg i juni, så det er jo ikkje så mange sjansar. Det begynner å likne på eit reint EM-uttak.
Det seier Vebjørn Rodal, friidrettsekspert i NRK, når han ser startlista på 5000 meter i den svenske hovudstaden onsdag.
EKSPERT: Vebjørn Rodal.
Foto: Sigmund Sagberg Andersen / NRKHer møter nemleg Henrik Ingebrigtsen norske profilar som Magnus Tuv Myhre, Awet Nftalem Kibrab og Abdullahi Dahir Rabi.
Tidligare sto også Per Svela og Filip Ingebrigtsen på startlista, men dei har bestemt seg for å ikkje springe i Stockholm.
Som regjerande europameister på 5000 meter har Jakob Ingebrigtsen friplass i EM. I tillegg kan Noreg stille med maksimalt tre løparar til på distansen.
Truleg blir Narve Gilje Nordås å sjå på startstreken, men forutan Ingebrigtsens friplass, er ingen av dei andre EM-billettane delt ut.
Ein del av grunnen, som NRK har skrive tidlegare, er at seks løparar – Jakob Ingebrigtsen inkludert – har klart EM-kravet på 13.20,00 minutt.
– Det bør vere temmeleg mykje klarare etter dette. Det kan komme eitt eller to løp som dei rekk innan fristen, men ein veit i alle fall veldig mykje meir etter det løpet der, gjentar Rodal om løpet i Stockholm.
Fristen for å kvalifisere seg til EM er 26. mai. Uttaket må vere klart tidleg 30. mai.
Stor spenning rundt storebror Ingebrigtsen
Rodal er spent på kva veteran Henrik Ingebrigtsen får til i sesongdebuten, med kniven på strupen kort tid før meisterskapen.
– Eg gleder meg til å springe og er spent på korleis kroppen kjennest ut når eg får startnummer på brystet, seier Henrik Ingebrigtsen til NRK.
33-åringen tok EM-sølv bak veslebror Jakob på 5000 meter tilbake i 2018 og blei nummer 13 i VM-finalen på same distanse året etter. Storebror Ingebrigtsen har ikkje vore i ein internasjonal meisterskapsfinale sidan det.
MOGLEG REPRISE: I VM-finalen på 5000 meter i 2019 løp Jakob (nummer tre frå venstre), Filip (nummer fem frå venstre) og Henrik Ingebrigtsen (nummer sju frå venstre). I EM kan ein igjen få sjå dei på same distanse.
Foto: NTB– Henrik kan jo sjølvsagt vere der, han òg. Eg tenker at han på eit eller anna tidspunkt må begynne å vere «over the top», men samtidig veit vi at vi skal aldri skal avskrive han heller, seier Rodal og fortset:
– Han har jo ikkje vist seg fram på lenge. Eg er litt spent på Henrik og Filip, om dei kjem tilbake der dei har vore.
Slokvik: – Eitt av dei viktige løpa denne månaden
Det er Erlend Slokvik, sportssjef i friidrettsforbundet, har eit vanvitig luksusproblem før EM. Han har siste ord når laget skal takast ut og har formidla til utøvarane at tider sett i 2024 blir vurderte over prestasjonar i 2023.
SPORTSSJEF: Erlend Slokvik styrer uttaksprosessen frå forbundets side.
Foto: Lise Åserud / NTBHan avviser likevel at 5000-meteren i Stockholm blir eit reint EM-uttak.
– Vi skal sjå på prestasjonane fram til fristen går ut, seier Slokvik til NRK.
– Men det blir viktig med tanke på at dei måler krefter direkte opp mot kvarandre?
– Ja, det blir ein del av vurderinga. Stockholm blir eitt av dei viktige løpa denne månaden, svarer toppidrettssjefen.
– Kven ligg best an bak Jakob Ingebrigtsen?
– Narve ser jo veldig bra ut. Utan om det vil eg ikkje seie så mykje, svarer Slokvik.
Nordås skal etter planen springe 3000 meter i Trond Mohn Games 22. mai for å vise distanseform inn mot EM-uttaket.
SKAL I AKSJON: Startfeltet i Stockholm blir sterkt prega av dei norske løparane. Blant dei som står på startlista er Awet Nftalem Kibrab (nummer tre frå venstre), Magnus Tuv Myhre (nummer to frå venstre) og Per Svela (nummer éin frå venstre). Her frå NM i fjor, der Tuv Myhre vann føre Kibrab og Svela. I front: Senay Fissehatsion.
Foto: BILDBYRÅN NORWAYFår tøff konkurranse
Stemnet er berre på nivå fem i friidrettspyramiden, bak Diamond League og gull-, sølv- og bronsestemna, men har likevel ei nærast oppsiktsvekkande god startliste. Rodal trur sigeren vil stå mellom svenske Andreas Almgren og amerikanske Paul Chelimo.
Almgren har ein personleg rekord som er såpass sterk som 13.01,70 frå 2022, men har ikkje klart verken EM-kravet eller OL-kravet på 13.05,00 foreløpig.
Les meir om Almgren her:
Chelimo jaktar også på OL-kravet etter ei skuffande avslutning på fjorårssesongen. 33-åringen står med OL-sølv frå 2016, OL-bronse i 2021 og VM-bronse i 2017 som høgdepunkta i ei innhaldsrik karriere på 5000 meter.
Dermed ligg mykje til rette for at det kan bli sett fart i Stockholm, der det i fjor blei norsk suksess med siger til Kibrab på 13.18,59 framfor Tuv Myhre, og med Rabi og Svela som nummer fire og seks.
– Eg trur det blir tøft for dei norske å vinne, men dei kjem til å vere med og kjempe, seier Rodal om løpet på onsdag.
PS! Tuv Myhre, Henrik Ingebrigtsen, Kibrab og Svela skal etter planen alle springe 5000 meter på Bislett 30. mai, men startskotet der går nokre timar etter at EM-troppen må vere meld inn.
