Stadfesta: Sjögren set målscoraren på benken

Slik NRK erfarte, vil landslagssjef Martin Sjögren i staden satse på Karina Sævik. 23-åringen frå Kolbotn har berre fire landskampar bak seg, og debuterte så seint som i Algarve Cup i februar/mars i år.

• Slik er fotball-VM på NRK og TV 2

Laget mot gruppefavoritt Frankrike i Nice i kveld, stadfesta av Norges Fotballforbund sin Twitter-konto:

• Ingrid Hjelmseth – Ingrid Moe Wold, Maren Mjelde, Maria Thorisdottir, Kristine Minde – Karina Sævik, Vilde Bø Risa, Ingrid Syrstad Engen, Guro Reiten – Caroline Graham Hansen, Isabell Herlovsen.

– Det er eit spennande laguttak, seier NRK-ekspert Carl-Erik Torp.

Han meiner uttaket tyder på at landslagssjefen ventar eit kampbilete der Noreg blir liggande bak og må kontre.

– Då er det fornuftig å ha to punkt med Graham Hansen og Herlovsen der ein faktisk kan skape noko på eiga hand, spesielt med Hansen.

– Samstundes må ein demme opp for dei offensive truslane vi veit Frankrike kjem med. Caroline Graham Hansen har utfordringar defensivt, derfor trur eg Sjögren vel å setje henne på topp. Sævik er heller ikkje veldig sterk defensivt, men likevel litt betre, seier Torp.

– Graham Hansen kan nesten trylle

Han kallar uttaket overraskande, men kult.

– Graham kan no ligge midt på bana og starte angrepa derfrå. Når ho får ballen der, kan ho nesten trylle, for ho kan vere eit heilt angrep åleine. Det kan vere Noregs sjanse mot dette franske laget.

Han har dette å seie om Karina Sævik:

– Ho er fersk på dette nivået, men har vist at ho er ein x-faktor som kan skape noko mot god motstand. Og vi må våge å angripe, ikkje berre forsvare oss. Vi må også gjere noko når vi vinn ballen, seier Torp.

– Motstandar utan svake punkt

Han trur ikkje Utland er vraka, det er vurderinga av motstandaren som er årsaka.

– Det ligg betre sjansar i denne kampen her med andre spelarar. Utland er fort inne igjen i neste kamp, men dette blir truleg eit heilt anna kampbilete. Derfor blir vurderingane annleis.

– Kva ventar Noreg mot Frankrike?

– Eit fantastisk fotballag utan tydelege svake punkt. Dei har mange verdsstjerner i alle posisjonar, dei har fart, kraft og er nesten komplette. Det er gøy å verkeleg få merke kvar vi står.

– Kvar kamp lever sitt eige liv, og det kan vere avgjerande kor gode Noreg torer å vere. Det betyr å ikkje la seg stresse av situasjonen og det franske heimepublikummet, men vågar å gjere det ein er samde om. Då kan det bli ein jamn kamp, seier Torp.

Frankrike-Norge ser du på NRK 1 fra kl. 20.10.