– Eg klarer aldri å sjå intervju med meg sjølv!
Nordås beskriv seg som introvert og reflektert, men sjølv ein sindig kar frå Jæren kan miste hovudet når det går bra på løpebanen. Det merkar han sjølv når nokon hentar fram reprisane frå NRK:
– Det der er ikkje meg. Han der er jo ekstrovert. Han er jo nærast euforisk. Du får adrenalin ut av øyra, forklarer Nordås, som knapt kjenner seg sjølve igjen når han serverer den eine vittigheita etter den andre.
Han snakkar med NRK på telefon frå Spania, der han har gjort dei siste VM-førebuingane med trenar Gjert Ingebrigtsen. Torsdag kjem han til Glasgow. Fredag er det alvor med forsøk på 1500 meter – og moglegheiter for meir eufori.
«Shit, nå angrar eg»
Den førre sesongen baud på ei rekke av dei augeblinkane. Nordås braut draumegrensa 3.30 minutt på 1500 meter under Bislett Games, blei nummer to i Diamond League i London og krona sesongen med VM-bronse. Da er det ikkje rart sjølvtilliten blir: «skyhøg»:
Og i takt med suksess på løpebanen, auka sjansane for eit spinnvilt intervju med 25-åringen.
– Du snakkar utover deg sjølv. Du snakkar i eufori, det er liksom ikkje måte på kor fantastisk alt saman er ... men så går det nokre timar. Da tenker eg: «Shit, nå angrar eg på det eg sa». Ein er i ei viss grad utilrekneleg.
Og det veit dei rundt han å spele vidare på. For han slepp ikkje unna. Sjølv om han hatar å sjå seg sjølv bli intervjua, er ikkje dei næraste framande for å sjå reprisane.
– Eg prøver å unngå det, men av og til prøver nokon å tyne meg. Viss dei har lyst å plage meg. Men da spring eg inn i eit anna rom, seier Nordås – og forklarer kvifor han flyktar frå situasjonen:
– Viss du hadde intervjua meg her og nå (ikkje etter eit løp), så hadde det ikkje gått an. Ein får ein litt annan personlegdom, ein blir ikkje så reflektert. Da seier ein mykje dumt.
Kompisen: – Det er så mykje greie
Han får medhald frå treningskameraten sin Per Svela. Da Nordås-trenar Gjert Ingebrigtsen ikkje fekk akkreditering i Budapest, var det Svela som overtok rolla som næraste støttespelar under VM.
– Han er ein ganske reflektert kar i utgangspunktet, så det er ikkje alltid dei tinga heng heilt på greip, seier treningskamerat Per Svela til NRK.
HUMØRFYLTE: Narve Gilje Nordås og Per Svela var tett på kvarandre under VM i Budapest.
Foto: Beate Oma Dahle / NTBMens VM-bronsevinnaren snakka om «the high highs and the low lows» og heldt show, prøvde makkeren å halde han litt nede på jorda. Tidvis var det ikkje så enkelt.
– Det gjeld ikkje berre for han, det kan gå igjen for mange løparar. Idet du kjem i mål så er du ikkje tilrekneleg. Det er så mykje adrenalin og det er så mykje greie – og så lirer du av deg noko, seier Svela.
PS! Narve Gilje Nordås innleier VM med forsøk 1500 meter på NRK 1, fredag klokka 21.10. Kort tid seinare er det semifinalar på 400 meter med moglegheit for norsk deltaking om Henriette Jæger og Karsten Warholm tar seg vidare frå forsøket.
