Du har nok høyrt det før. Det er sesongstart i hopp og ein ny norsk komet dukkar plutseleg opp heilt i toppen.
I fjor var det Philip Sjøen, i år er det Daniel Andre Tande.
I Klingenthal i går tok han sin fyrste verdscupsiger og knuste heile verdseliten.
Medietrykket kan øydelegge
– Da fekk eg kryssa det av lista, det var moro, seier Tande dagen etter på telefon til NRK.
Nå handlar alt om at det ikkje skal bli det einaste krysset på lista over norske skihopparar med verdscupsigrar.
Om ein kikkar på den lista er det ikkje få nordmenn som har stoppa tidleg opp i jakta på rekorden Gregor Schlierenzauer innehar akkurat nå med 53 sigrar.
Her er eit knippe utval av tidlegare kometar som ikkje har klart å etablere seg som stabil sankar av fyrsteplassar det siste tiåret.
NRKs ekspertkommentator Johan Remen Evensen stod sjølv berre igjen med ein triumf i verdscupen da han la opp i 2012. Han trur forventingspresset kan vere ei årsak til at kometane forsvinn.
– Det kan det definitvt vere. Viss det fyrste som skjer når ein kjem inn i verdscupen er at ein vinn, blir det utruleg mykje styr rundt deg. Det er mange som ikkje er van til å takle det presset og det kan bli alt for mykje for nokon, seier Remen Evensen.
Spørsmålet er da om Daniel Andre Tande er av det kaliberet som kan takle eit slikt forventingspress.
– Det verkar som han er det sjølv om det er umogleg å svare på før han har vore gjennom det. Men han har beina godt planta på jorda. Eg trur at han kjem til å takle den mediestormen som kjem rundt han berre positivt.
Får råd frå Sjøen
Sjølv synest Tande det er vanskeleg å seie korleis han kjem til å takle presset den gule leiartrøya han skal hoppe med i Kuusamo medfører.
– Eg har ikkje tenkt så mykje over det. Det kan hende det går bra, men det kan hende det ikkje gjer det. Eg tenkte eg skulle spørre lagkompisane som sitt med mykje erfaring på den biten om råd.
Ein han spesielt kjem til å snakke med er kompisen Philip Sjøen. Sjøen var i Tandes sko som den nye store på same tid i fjor, og fekk verkeleg kjenne på presset.
– Philip snakkar eg mykje med. Me er gode kompisar og han har nok eit par gode råd han også, seier Tande før han set seg på flyet heim til Oslo og Kongsberg.