Hoppa 291 meter – blir nekta verdsrekord: – Bryr eg meg ikkje om

– Det er heilt utruleg. Det var så mykje informasjon å ta inn, men samtidig var det så lite som kom ut i går. Det sende sjokkbølger i hoppmiljøet, seier Halvor Egner Granerud til NRK.

– Vi har nettopp vore vitne til ganske dryg historie. Det vil alltid vere før og etter verdsrekorden til Ryoyo, seier Johann André Forfang til NRK.

Det har vore lite informasjon å finne. I eitt år har Red Bull i all løyndom bygd ein monsterbakke i Hlíðarfjall på Island.

– Alle eg kjenner var utruleg opptatt av å finne ut meir rundt dette. Det har kokt ganske bra det siste døgnet, seier Granerud.

Islandske RUV kunne tysdag avsløre at det var den japanske hoppstjerna Ryoyu Kobayashi som gjorde fleire hopp i gigantbakken.

Onsdag ettermiddag melder Red Bull at det lengste hoppet vart på 291 meter, saman med ein video av det nemnde hoppet.

Ein smilande Kobayashi er også avbilda med eit skilt der det står 291 meter og «ny verdsrekord», men monsterhoppet får ikkje den statusen.

– For meg er det verdsrekord

Det internasjonale ski- og snøbrettforbundet (FIS) melder nemleg i ei pressemelding at verdsrekorden for herrar framleis tilhøyrer austerrikske Stefan Kraft og dei 253,5 meterane hans sett i Vikersund i 2017.

Forbundet grunngir avgjerda med at hoppa til Kobayashi ikkje blei gjort med same premissar og reglar som i FIS-renn.

«Ein skiflygingskonkurranse må vere basert på eit FIS-sertifisert avstandsmålesystem og gå føre seg på ein skiflygingsbakke godkjent av FIS», står det vidare.

– Akkurat det bryr eg meg ikkje om, kjenner eg. For meg er det verdsrekorden, seier Forfang og held fram:

– Det trur eg alle som ser på og bryr seg om skihopping tenker. Du må på ein måte ta eit standpunkt. Skal du vere lojal til FIS, eller skal du vere lojal til sporten vår? For min del vil alltid sporten komme først.

Norske Stian Skinnes er assistenttrenar for Kobayashi, og syr også dressane til japanaren. Han rekna ikkje med at FIS ville omtale det som ein offisiell verdsrekord, men dei kallar det i alle fall det sjølv.

– Det å få vere her på Island og sette ein uverkeleg verdsrekord er berre heilt utruleg. Det vil alltid bli nemnt som det lengste skihoppet i verda, seier Skinnes til NRK.

– Mista kontrollen over eigen kropp

Skinnes fortel at noko av det første Kobyashi sa etter hoppet på 291 meter var «nå som eg ikkje har hoppa 300 meter, må vi berre fortsette».

Kobayashi skal i alle fall ikkje gjennomføre fleire hopp i monsterbakken i denne omgangen, og om det blir fleire forsøk i framtida er uvisst.

– Det er enormt ressurskrevjande, seier Skinnes.

Nordmannen beskriv rekordsvevet til Kobayashi som ein fantastisk augeblink for hovudpersonen sjølv.

– Han var heilt frå seg og det verka som han mista kontrollen over eigen kropp. Kjenslene tok overhand. Målet er på ein måte nådd, seier Skinnes.

– Det der er draumen

– Det hadde på ein måte vore kult viss han hadde komme seg over 300, men samtidig litt urettferdig viss han bryt den barrieren når ingen andre har fått høve til å prøve seg, seier Granerud.

Det lengste hoppet som tidlegare har blitt målt var russiske Dmitrij Vasiljev sitt hopp på 254 meter i Vikersund i 2015. Men russaren fall, og fekk dermed ikkje verdsrekord.

– Det er ikkje det hopptekniske som set restriksjonar for kor langt vi kan fly. Det er bakkestørrelsen. Dette viser at det er mogleg å bygge store hoppbakkar og forhåpentleg få gjennomført på ein forsvarleg måte, seier Granerud.

Då NRK snakka med Granerud skal det lengste hoppet til Kobayashi ha vore på 256 meter.

Den norske hoppstjerna trur likevel ikkje at slike bakkar blir å sjå i verdscupen med det første.

– Eg trur i utgangspunktet at det er fint at det er strengt regulert. Men at ein har høve til å gjere «showting» ein gong iblant synest eg er kult. Det hadde vore gøy viss dei hadde invitert fleire enn berre éin, forklarer han.

Forfang skulle absolutt ønske at han hadde fått moglegheita i monsterbakken.

– Det der er draumen. Sjølvsagt har eg lyst til å vere med på noko sånt. Viss dei gjentar bedrifta, så sit eg på første fly, seier han.

Les også Prata ut med Stöckl på fest – avslørar nye detaljar om hoppbråket

Kan bidra til vekst

Sjølv om Granerud skulle ønske at alle fekk høve til å hoppe i monsterbakken, så trur han at Red Bull-stuntet er positivt for sporten.

– Eg vil tru at dette er eit prosjekt for Red Bulls hovudkanalar på sosiale medium. Det her kjem til å nå veldig mange som ikkje får med seg skihopping til vanleg, så dette er berre bra for skihopping, forklarer han.

– Det her er med på å stake ut kursen vidare for sporten vår, seier Forfang.

– Med den farten FIS har på utvikling av skiflygingsbakkane, så blir det liksom ikkje i vår levetid. Det her kan vere med på å definere regelverket til FIS i åra som kjem. Eg er veldig spent på kor ting tar vegen framover, held han fram.

null

Spiller nå

Sjekk Ruuds sommerskille: – Noe av det raffeste jeg har sett 00:21

Neste

Spyler ned NRK-reporteren: – Var ikke det gøy? 02:25 Ut mot OL-sengene: Dro rett på Ikea 00:58 Iuels private bilde får lagvenninnene til å måpe 00:56

Vis flere