Løpstalent hevdar utestengt trenar tvang ho ned i vekt

– Eg blir både opprørt og trist når eg høyrer Mary Cain si historie, seier Bjerkeli Grøvdal til NRK.

Mary Cain vart i 2013 den yngste amerikanske friidrettsutøvaren til å stille i eit verdsmeisterskap. Men historia ho har delt denne veka i New York Times har skaka friidrettsverda.

Det unge talentet var lenge ein del av prestisjeprosjektet til Nike – og den nyleg dopingutestengte trenaren Alberto Salazar.

Salazar skal har vore overtydd om at det amerikanske løpstalentet måtte bli tynnare og tynnare, heilt til ho nådde målet om å bli 114 pund (51,7 kg).

Etter at han i haust vart utestengt i fire år for brot på dopingreglementet og programmet vart lagt ned, valde Cain å dele si eiga historie under dette regimet.

Fekk sjølvmordstankar

Trenaren skal mellom anna bede ho om å gå på prevensjon og ta vassdrivande middel for å gå ytterlegare ned i vekt.

Til slutt skal kroppen ha blitt så nedkøyrt at ho mista menstruasjonen i tre år og brakk fem bein i kroppen.

Cain utvikla sjølvmordstankar og begynte i periodar å kutte seg sjølv.

– Eg slutta å like å springe for ein lang periode. Eg var så såra over at ingen såg meg slite eller prøvde å hjelpe meg, fortel ho i eit intervju med Insider.

Då Cain folèt Nike sitt Oregon-prosjekt i 2016 skal ho ha følt seg fysisk og følelsesmessig mishandla av Salazar.

Cain seier at trenaren hang ho ut framfor andre i laget då ho ikkje nådde krava til vektmål.

– Ingen gjorde eller sa noko, fortel Cain.

Då ho sjølv fortalde trenaren at ho hadde kutta seg, skal han ha sparka ho frå laget. Til slutt var det foreldra som henta ho heim og bad ho om å slutte i Nike-programmet.

Salazar nektar for skuldingane – Nike undersøker saka

Nike seier i eit intervju med Insider at dei tek påstandane svært alvorleg, og at dei kjem til å forhøyre seg med tidlegare utøvarar som har delteke i programmet.

– Vi prøver alltid å sette utøvarane i sentrum for alt vi gjer, og desse påstandane er heilt i strid med verdiane vår, opplyser Nike.

Salazar nektar for skuldingane overfor The Oregonian.

– Verkan foreldra eller Mary tok opp problema ho no påstår skjedde då eg trente henne. For å vere tydeleg: Eg oppmuntra aldri, eller endå verre, hang ho ut, for å oppretthalde ei usunn vekt, seier Salazar.

Ei rekke internasjonale medium, blant anna CNN, har forsøkt å få intervju med Salazar utan å lykkast.

Ber unge jente ikkje samanlikne seg med andre

Karoline Bjerkeli Grøvdal har konkurrert mot Mary Cain og kjennar ho litt som utøvar. Sjølv har ho aldri opplevd noko liknande, men Grøvdal meiner det er veldig viktig å belyse saka.

Laurdag skreiv ho eit langt innlegg om temaet på Instagram.

– Eg blir opprørt fordi støtteapparatet, i Cain sitt tilfelle, har skulda, skriv Grøvdal.

– Vekt er eit tilbakevendande tema i denne sporten. I staden for å bli påverka av kva andre seier og meiner, håpar eg at unge idrettsutøvarar når ut til nokon dei stolar på og nokon som faktisk veit kva dei snakkar om, skriv Grøvdal vidare.

Grøvdal utdjupar overfor NRK at ho trur det er mangel på kompetanse blant leiarar og trenarar rundt utøvarane.

Kroppspress er ein kjent problematikk i mange idrettar.

– Eg trur mange, både idrettsutøvarar og miljøet, har erfaringar med og kjennskap til kroppspress. Men eg trur det er viktig å kunne prate om kropp og vekt i for eksempel springing. Det er ikkje noko å skjule at det er viktig. Det er viktig å vere lett, og det er ein del av idretten. Det er viktig å ha openheit om det, men eg trur det er viktig å ha kunnskap om kva som er rett og gale. Fordi det er små marginar. Kompetanse hos trenarar og leiarar, og folk rundt utøvarane, er veldig viktig, seier Grøvdal.

Den norske friidrettsutøvaren peikar på at det ikkje er noko som heiter den perfekte eller ideelle kroppen.

– Vi er alle ulike, vi har alle ulike organ og vi har ulike behov for å prestere på vårt beste.

Ho kjem også med klare råd til unge jenter som opplever kroppspresset i idretten. Grøvdal meiner unge jenter ikkje skal samanlikne seg med andre.

– Godta aldri at ein trenar eller andre i støtteapparatet ditt fortel deg korleis kroppen din skal sjå ut, skriv Grøvdal.