Kristoffersen veg no 83 kilo. Det er sju kilo meir enn han vog på slutten av førre sesong, men det er ikkje fordi han har lege på latsida. For det å få nokre fleire kilo på kroppen var eit bevisst val.
– Det har vore eit mål lenge på ein måte. Det å gå opp i vekt. Eg har blitt litt småfeit. Eg har sett 85 som mål, meir enn det burde eg ikkje gå opp, seier Kristoffersen til NRK.
For Kristoffersen ønsker å gjere det betre i storslalåm, og mange av konkurrentane hans har vege meir enn han. Vektauken gjer at han kan få høgare toppfart.
– For min del kan det vere ei moglegheit til å vere litt meir brutal, og det kan jo hjelpe til tider, seier han sjølv.
– Eit steg i riktig retning
NRKs alpinekspert, Kjetil André Aamodt meiner det er positivt at Kristoffersen har lagt på seg. Dei sju ekstra kiloa kan utgjere ein forskjell i sesongen som kjem.
– Eg trur det er riktig, spesielt i nokon storslalåmløyper, der det kan vere til hjelp å ha litt meir kraft og muskulatur. Det gjeld også på flatene i slalåm. Eg trur det er eit steg i riktig retning for han, seier Aamodt.
Alpinistane startar sesongen sin i Sölden i Austerrike no på laurdag. Da er det klart for storslalåm. Aamodt trur konkurrentane verkeleg skal få noko å bryne seg på i både slalåm og storslalåm denne sesongen.
– Han var ikkje dårleg da han vog ti prosent mindre heller, men eg trur konkurrentane verkeleg skal få slite med Henrik Kristoffersen i den kommande sesongen.
– Du trur han blir enda råare?
– Ja, eg trur det. Eg trur han kan vinne enda fleire skirenn i år enn han gjorde i fjor, svarer Aamodt.
Fokuserer på det han kan vinne
I fjor kjempa han ein beinhard kamp mot landsmannen Alexander Aamodt Kilde og franske Alexis Pinturault om samanlagdsigeren i verdscupen.
Denne sesongen har Kristoffersen bestemt seg for å berre fokusere på slalåm og storslalåm.
– Så langt i karrieren har det kulaste vore å vinne skirenn. Det kjem eg ikkje til å gjere i super-g og utfor med det første. Da prøver eg heller å ha fokus på dei to greinene der eg faktisk kan vinne, seier Henrik Kristoffersen til NRK.
NRKs alpinekspert, Kjetil André Aamodt meiner det er eit klokt val.
– Eg trur det er heilt riktig å fokusere på slalåm og storslalåm, mest sannsynleg ut karrieren. Forsøk å samle så mange verdscup-sigrar som mogleg, det er det du blir målt på når du er ferdig. Du har mykje større sannsyn for å vinne mykje om du fokuserer på færre greiner, seier Aamodt.
Aamodt trur ikkje det at han berre køyrer to disiplinar treng å stoppe han frå å vinne totalkula.
– Han er såpass god at han kan vinne totalkula viss han har ein god sesong i dei to greinene.
Sjølv om det ser bra ut på trening om dagen, så tek ikkje Kristoffersen sigeren på forskot.
– Altså ein kan vere så rask ein berre vil på trening, men det hjelper ikkje viss ein ikkje kan få det ut i renn. Du blir ikkje verdsmeister på trening. Du blir verdsmeister av trening, avsluttar Kristoffersen.