India tok OL-gull utan å vinne eitt sjakkparti i finalen

India vann ingen av dei tolv partia i sjakk-OL-finalen mot Russland. Likevel vart gullet delt mellom dei to stormaktene.

Vishy Anand, Daniil Dubov og Jan Nepomnjasjtsjij

TOK GULL: Vishy Anand (India), Daniil Dubov (Russland) og Jan Nepomnjasjtsjij (Russland) spelte på ulike lag, men tok begge gull.

Foto: Jørund Wessel Carlsen / NRK og Berit Roald / NTB scanpix

Den indiske presidenten var oppstemt etter at India delte gullet med Russland.

– Gratulerer til det indiske laget som vann OL. Heile India jublar over den fantastiske prestasjonen, skreiv den indiske presidenten Rashtrapati Bhavan på Twitter.

Men vann India eigentleg OL?

På resultatlista står Russland oppført med 4,51,5-siger.

Likevel vart gullet delt.

Internett ramla ned

På siste finaledag vart det spelt seks parti. På grunn av det globale koronautbrotet vart partia spelte på nett.

Russland vann tre, medan dei siste tre enda med remis. I ettertid viser det seg at to indiske spelarar mista internett-tilkoplinga undervegs i partiet, og at dei dermed tapte partiet på tid.

Den indiske lagleiinga sende inn klage - og fekk medhald.

Arkadij Dvorkovitsj

PRESIDENT: Arkadij Dvorkovitsj er president i det internasjonale sjakkforbundet. her avbilda under VM i fischersjakk i 2019.

Foto: Jørund Wessel Carlsen / NRK

– Sjakk-OL vart sett ut av eit globalt internett-samanbrot. Det påverka fleire land, mellom anna India. To spelarar mista tilkoplinga då kamputfallet framleis var uavklart, seier FIDE-president Arkadij Dvorkovitsj.

– Eg synest det er rettferdig. Laga var ganske jamne, så det er ei fin avslutning, sa India si store sjakkstjerne, Vishy Anand, til ESPN India.

Anand la òg ut ei melding på Twitter som summerte opp kaoset:

– Vi vann! Gratulerer Russland, skreiv han.

Laster Twitter-innhold

Forbanna russarar

Aleksandra Kostenjuk spelte på det russiske laget i finalen og var lite imponert over avgjerda frå det internasjonale sjakkforbundet.

– India vann ikkje OL, men vart kåra til delt vinnar. Etter mitt syn er det ein stor forskjell mellom å vinne gullet og bli tildelt sigeren utan å vinne eit parti i finalen, skriv Kostenjuk på Twitter.

Det internasjonale sjakkforbundet vedgår at avgjerda ikkje var optimal.

– Kanskje blidgjer vi ikkje alle med denne avgjerda, men det verkar optimalt, ut frå føresetnadene. Det er synd at det enda sånn, men dette er realitetane på nett, skriv FIDEs generalsekretær Emil Sutovskij i ei fråsegn på Facebook.

Daniil Dubov

SINT: Daniil Dubov pleier å seie ifrå viss han er usamd. Det gjorde han òg etter OL-finalen.

Foto: Jørund Wessel Carlsen / NRK

Der får han svar frå Daniil Dubov, som spelte finalen for Russland.

– Den optimale løysinga er å gi gull til laget som vann null parti på to kampar og tapte eit parti i finalen?, skriv Dubov.

– Problematisk

NRKs sjakkekspert Atle Grønn forstår ikkje heilt den russiske irritasjonen, men meiner sjakken står overfor eit vanskeleg val.

– Det er greitt å ha turneringar på nett, men å gjere det til offisielle meisterskap er problematisk. Sjakken har lange tradisjonar der alt skal vere på stell. At det blir så tilfeldig gjer at det er vanskeleg å overføre sjakk til internett, seier Grønn.

– Det er ikkje eigna som konkurranseform på nett. Det er alvorleg for sjakken, seier Torstein Bae.

Atle Grønn

SKEPTISK: NRKs ekspert Atle Grønn synest ikkje OL-turnering på nett var ei veldig god turneringsform.

Foto: Jørund Wessel Carlsen / NRK

Siste nytt

  • Wolves med komfortabel siger

    Wolverhampton vann 2-0 mot Crystal Palace i kveldens oppgjer i Premier League. I sin første kamp frå start sette Rayan Ait-Nouri inn 1-0 etter 18 minuttar. Knappe ti minuttar seinare fekk Daniel Podence si første skåring for sesongen. Like før slutt fekk Crystal Palace-spelar Luka Milivojevic raudt kort etter ein stygg takling på João Moutinho.

    Britain Soccer Premier League
    Foto: Andrew Boyers / AP
  • Tande og Opseth vann NM

    Silje Opseth og Daniel André Tande vann NM i hopp i normalbakken i Midtstubakken. Sjølv om Maren Lundby ikkje deltok la ikkje det nokon dempar på sigersgleda.

    – Det var ingen garanti for at det skulle gå vegen for meg i dag. Det at eg står på toppen i dag smakar godt, sjølv om Maren ikkje var med, seier Opseth med eit stort glis.

    Tande sikra seg sin første kongepokal med sigeren i kveld.

    – Det er ingen Kongsberg-hoppar i historia som har tatt ein kongepokal, så det er godt å endeleg få plassert den pokalen i skihistoria på Kongsberg, seier Tande til NRK.

    Gleda over å få med seg ein kongepokal får derimot ikkje Opseth. For kvinnene får ikkje nokon kongepokal.

    – Eg synest det er litt kjedeleg, seier Opseth til NRK.

    Det er eit krav om at ein må vere over 15 deltakarar for å dele ut ein kongepokal. I årets renn for kvinnene var det 9 som stilte til start.

    – Eg veit ikkje om det er ny rekord i år, men me er vert fall mange fleire enn me har vore tidlegare, og det er positivt. Me tar med oss det, sjølv om me ikkje er mange nok til å få kongepokal, seier Opseth.

    Halvor Egner Granerud tok sylvet og Marius Lindvik tok bronse. Eirin Kvandal kom på plassen bak Opseth, og Anna Odine Strøm tok bronse.

    Arrangementet skulle eigentleg vore i mars, men blei utsett på grunn av koronapandemien.

    NM-hopp kvinner og menn
    Foto: Heiko Junge / NTB
  • Njåtun med ti strake NM-gull

    Ida Njåtun var nok ein gong sterkast på 1500 meter i skøyte-NM. For ho tok gullet på distansen for tiande gong på rad. Ho klokka inn på 1.58,06 i Vikingskipet i Hamar. Det er meisterskapsrekord, ifølge NM-arrangøren Asker skøyteklubb.

    Tidlegare på dagen vann Håvard Holmefjord Lorentzen gullet på 500 meter. Bergensaren gjorde årsbeste med 35,06.

    Hallgeir Engebråten kunne juble for siger på 5000 meter. Han tok sitt første seniorgull i NM, med tida 6.27,53.

    VM skøyter allround / sprint 2020 Hamar
    Foto: Fredrik Varfjell / NTB

Sendeplan

Kl. Program Kanal