– Eg kan alltid bli bedre, det stoppar ikkje her, seier Hegerberg.
21-åringen var ein nøkkelspelar i jubelsesongen til franske Lyon i fjor. Ho skåra 54 mål på sine 34 kampar i løpet av sesongen, og blei toppskårar i meisterligaen med 13 mål.
Det vart ho lønna for i dag, då ho vann prisen for årets beste spelar i Europa.
– Det var ein ambisjon for oss å vinne alle trofea denne sesongen, og det klarte me. Å stå med dette trofeet til slutt er heilt utruleg, sa Hegerberg på scena.
Saman med laget sitt, Lyon, vann ho både ligaen og cupen i Frankrike, samt meisterligaen.
Toppskårar
– Dette er berre byrjinga. Eg er svolten på å forbedre meg, og eg skal jobbe med detaljane for å bli bedre for kvar dag og kvar sesong, seier den norske landslagsspelaren.
Hegerberg var nominert til prisen i lag med lagvenninne Dzsenifer Marozsan og tidlegare lagvenninne Amandine Henry.
Journalistar frå UEFAs 55 medlemsland har stemt fram fotballspelarane til prisen, som blir delt ut for fjerde gong. 20 journalistar var med i utvalget, og heile 13 av dei stemte på Hegerberg. Henry fekk fire, medan Maroszan fekk tre stemmer.
– Å stå her med dette trofeet er ei stor ære. Eg er veldig nøgd. Det er ei utruleg kjensle, seier Ada Hegerberg.
– Glad ho er norsk
Norges landslagssjef, Roger Finjord, er svært stolt over Hegerberg.
– Dette er eit stort og stolt augeblikk for Norge. Me er veldig glad for at Ada er norsk, og at ho spelar for Norge.
Finjord trur også at prisen ikkje gjer at Hegerberg slakkar av, men at ho derimot vil bruke den som motivasjon for å bli endå betre.
– Ada vil alltid utvikle seg. Ho vil ta denne prisen som inspirasjon til å bli betre og ikkje som ei sovepute.
Landslagssjefen meiner også at dette stadfestar Norges posisjon som fotballnasjon i verda.
– Det er ein kjempeinspirasjon for norsk fotball, og det viser at me skal vere med der prisar blir delt ut, både på individ- og lagnivå.
Ronaldo vann herreklassen
I herreklassen var Antoine Griezmann, Gareth Bale og Cristiano Ronaldo nominert. Der var det sistnemnde som gjekk av med sigeren.
Ronaldo skåra blant anna 35 mål på 36 kampar då Real Madrid kom på andreplass i La Liga i fjor, og var ei viktig brikke då Real vann meisterligaen. Han vann også EM med Portugal, sjølv om han måtte ut på båre i finalen.
Han skåra totalt 51 mål i alle turneringar.