Det gjekk berre eitt minutt og 45 sekund frå Yaya Touré hadde sett inn 1-1 til Samir Nasri banka inn 2-1 til Manchester City. Begge scoringane var i tillegg så vakre at dei fortener å bli utbrodert:

55 minutt, 1-1: Ballen endar i føtene til Touré, som hadde vore anonym i første omgang. På første touch plasserer han ballen perfekt opp i lengste vinkel bak ein utspelt Sunderland-keeper Vito Mannone.

Så, neste City-angrep:

56 minutt, 2-1: Førehandsfavoritten rullar opp på venstresida, før Aleksandar Kolarov slår hardt inn. Innlegget skiftar retning før Samir Nasri frå banka til i fart. Ballen flyg i lengste hjørne bak ein igjen utspelt Mannone.

– Vi er meistrar og vi fortente sigeren i dag. Dette betyr mykje for fansen og eg er svært glad. Eg håper dette gir oss sjølvtilliten til å vinne fleire trofé denne sesongen, kommenterte Nasri til BBC etter kampen.

Vakker kontring sjokkerte City

Kampen blei runda av til 3-1 av Jesus Navas etter ei kontring, men til pause stod det 0-1 på Wembley.

City gjekk ut i 100 og slengde fram både høgre- og venstreback gjentekne gonger. Det burde dei ikkje gjort så hyppig, for på topp hadde Sunderland Fabio Borini.

Ti minutt ut i ligacupfinalen blei City straffa. Ei lynrask kontring enda med at Borini blei spelt gjennom. Han distanserte forsvaret, før han frå skrått hald banka inn 0-1 med utsida av foten.

I etterkant av scoringa klarte eit kompakt Sunderland å halde City unna dei store sjansane.

– Plasserte den i krysset frå 30 meter

I andre omgang heldt derimot ikkje Sunderland-muren. Kvalitetsforskjellen på laga blei synleg, og City tok sin første triumf for året.

– Vi er svært skuffa. Vi starta kampen akkurat som vi ville, vi kontra og scora eit fantastisk mål, sa kaptein John O'Shea til BBC etter kampen.

– Så scorar dei eit fantastisk mål for å kome inn igjen i kampen. Han (Yaya Touré) plasserer ballen i krysset frå 30 meter. Vi mistar organiseringa vår i nokre minutt og det kostar oss eit mål nummer to imot, meinte O'Shea vidare.

Sunderland-kapteinen, som tidlegare har ti ulike triumfar med Manchester United, meiner laget no må samle seg kjapt. Dei ligg nemleg på direkte nedrykk og kjempar hardt for poenga i Premier League.

For City sin del er det kamp om ligagullet, kvartfinale i FA-cupen og eit lite håp om avansement i Meisterligaen som gjeld.

Lagoppstillingar:

Sunderland (4-3-3): Mannone - Bardsley, Alonso, O'Shea, Brown - Cattermole, Colback, Ki - Larsson, Johnson, Borini.

Innbyttarar: Ustari, Fletcher, Gardner, Celustka, Giaccherini, Vergini, Scocco.

Manchester City (4-4-2): Pantilimon - Zabaleta, Kompany, Demichelis, Kolarov - Nasri, Toure, Fernandinho, Silva - Aguero, Dzeko.

Innbyttarar: Hart, Clichy, Lescott, Milner, Garcia, Navas, Negredo.