Det er forslaget til den olympiske komiteen (IOC)
som har fått dei to fiendane til å stille seg skulder ved skulder for å berge den tradisjonsrike idretten.Det er eit oppsiktsvekkjande samarbeid mellom to av dei største fiendane i den internasjonale politikken. USA fryktar at Irans atomforsking er kamuflasje for utvikling av atomvåpen, og Iran lar sjeldan ein sjanse gå frå seg for å omtale USA som "den store satan".
Dette har også ført til vestlege sanksjonar mot Iran. Mange andre storpolitiske spørsmål har også vore – og er – med på å byggje ein mur mellom dei to landa.
– Viktigare enn politikk
Dei to landa har ikkje hatt diplomatisk samband med kvarandre sidan 1980. Då storma iranske studentar USAs ambassade i Teheran og tok 52 tilsette som gislar. Først etter 444 dagar fekk gislane sleppe fri.
Men no gjer dei felles sak. For dette er "viktigare enn politikk". Iallfall ifølgje leiaren i USAs bryteforbund, Rich Bender.
Eit utval i IOC har foreslått å stryke bryting frå OL-programmet i 2020. Det betyr at brytesporten må konkurrere med mange andre idrettar om å få plass. Avgjerda fell i september.
Samarbeider med "de store satan"
Iran er ei stormakt i brytesporten. Det er også USA, og Iran tek derfor meir enn villig imot hjelpa frå landet dei i andre samanhengar omtalar som "den store satan". I desse dagar er Rick Bender i Teheran i samband med eit verdscupstemne i fribryting. Han er der også for å diskutere framstøytar for at brytinga skal ha sin verdfulle plass på OL-programmet.
– Vi treng støtte frå Iran og Russland for å behalde bryting på OL-programmet, og det er ein kamp som hevar seg over politikken, seier Bender ifølgje Irans telegrambyrå ISNA.
Irans brytepresident Hojatollah Khatib håpar at denne "uventa alliansen" mellom bryte-tungvektarane kan endre IOCs syn.
– Vi snakkar med eit felles språk
Hedgeus Csaba, presidenten i det internasjonale bryteforbundet, er glad for det amerikansk-iranske initiativet.
– Eg er glad for at Khatib og Bender har eit så vennskapeleg og godt møte om dette. Det betyr at vi snakkar eit felles språk i denne kampen, nemleg bryting, seier Csaba.
Bryting er ein av dei aller mest tradisjonsrike idrettane. Den var med i dei antikke olympiske leikane frå år 708 før Kristus, og også i dei moderne leikane har dei hatt fast plass. Berre i 1900 gjekk eit OL av stabelen utan bryting på programmet.
I Iran har brytesporten tradisjonar som strekkjer seg heilt tilbake til det gamle Persia. Persiske kongar kjempa seg imellom og mot motstandarane i episke kampar.
Tungvektskamp i september?
Og i dag kan dei største brytekampane samle titusenvis av tilskodarar, og millionvis følgjer kampane på tv.
Men OLs eksekutivkomité går no inn for å kutte ut denne tradisjonelle idretten. Irans og USAs strategi går derfor i første omgang inn på å påverke IOC-styret til å avvise dette på deira møte i mai. Går ikkje det, vil dei jobbe vidare fram mot den endelege avgjerda i september.
Det kan gå mot ein skikkeleg tungvektskamp på IOC-kongressen i september.
PS: I Iran har framleis ikkje kvinner lov å delta i bryting.