Eckhoff etter VM-nedturen: – Har gjort feil eg ikkje har gjort før

– Eg er ganske misfornøgd eigentleg. Eg er god nok til å vere i toppen der, men får det ikkje ut. Da blir eg litt skuffa.

Søndagens fellesstart blei ein ny nedtur for Tiril Eckhoff i Anterselva. Ho som verka nærmast uslåeleg i verdscupen før VM.

– Må berre kaste bort våpenet nokre dagar

29-åringen tok seks verdscupsigrar og det verka som om Fossum-jenta endeleg hadde knekt koden for å prestere stabilt.

Men VM enda med 59, 20, 15 og 7.-plass i dei individuelle konkurransane.

– Skyteforma har vore elendig. Nå får eg berre kaste bort våpenet nokre dagar og glede meg over Marte, seier Eckhoff som likevel tek med seg to VM-gull frå stafett og blanda stafett.

NRKs skiskyttarekspert Ola Lunde meiner ein har sett det heilt frå innskyting før den fyrste øvinga.

– Eg har sett ei jente som ikkje har vore heilt i balanse frå innskyting, og det har ho tatt med seg inn i konkurranse. Ho kom skeivt ut og har ikkje klart å hente seg inn igjen. Det verkar som ho er litt for defensiv på det ho gjer, meiner Lunde.

Vanskeleg å rette opp dårleg start

VM-starten var spesiell tung med seks bom på sprinten og 59.-plass. Den dårlege skytinga drog ho med seg vidare i meisterskapet.

– Det er klart det er krevjande å rette opp ein dårleg start, seier Lunde.

Eckhoff sjølv trur det er ein god miks som har øydelagt sjansane for VM-medalje individuelt.

– Det er berre sånn det er med skyting, det er ein teknisk idrett. Eg har gjort nokre feil som på ein måte eg ikkje har gjort før. Det tyder jo ikkje heilt bra, seier Eckhoff som meiner den dårlege starten øydela mykje.

– Når du fyrst startar ræva, er det veldig vanskeleg å snu ein negativ spiral.

– Kva slags feil er det?

– Det er elementære feil som ikkje skal gjerast i meisterskap, seier ho ærleg.

Bomma med forma

Tidlegare skiskyttar og NRK-ekspert Liv Grete Skjelbreid trur at Eckhoff var litt uheldig med formtoppinga.

– Ho har ein heilt anna kapasitet enn det ho har fått ut i VM. Det gjeld å prikke inn forma, og den kom kanskje litt for tidleg for Tiril i år. Men det er tre rundar igjen i verdscupen og mange gjeve plasseringar å kjempe om, seier Skjelbreid.

Verdscupen i skiskyting held fram med renn i Nove Mesto frå torsdag 5. mars.