– Medan nokon var i ferd med å danse, fall det ned ei plate frå taket og small rett i golvet. Heldigvis var det ingen som stod rett under plata, men konkurransen og musikken stansa med ein gong, fortel Selina Jappée om det som skjedde.
Men det enda godt. Jappée og partnar Herman Keim utnytta pausen best og dansa seg til gull og VM-tittel.
Det var under VM i Rawa Mazowiecka utanfor Warszawa i Polen sist laurdag det skjedde.
To norske dansarar hadde akkurat avslutta sin dans, og det neste paret, frå Tyskland, hadde halde på i rundt eitt minutt då ei gipsplate i taket fall sju meter ned på golvet.
NRK har onsdag prøvd å få kontakt med både arrangørane i Polen og det polske danseforbundet utan å lykkast.
Flytta til mindre sal
Jappée og Keim hadde dansa sine innleiande rundar då takplata losna.
– Vi fekk beskjed om at det ville bli ein pause medan arrangørane granska taket. Vi fekk nye meldingar heile tida, og til slutt blei dansen flytta til ein annan sal på hotellet. Den salen var ikkje like stor, og det blei litt vanskeleg. Men golvet i den nye salen var betre for vår dans. Så det gjekk jo greitt, men det blei stress, seier ho.
«Gjekk greitt» er nok ei underdriving. For Selina og Herman brukte den uventa pausen svært godt.
Sprang til matsalen i pausen
– Vi hadde begge dansa solo også, og ikkje fått tid til mat. Vi tok til å bli slitne, og mangla energi. Straks pausen oppstod, sprang vi til matsalen for å få i oss litt mat, fortel Jappée.
Då finalen kom i gang i den nye salen, ein og ein halv time seinare, gjekk alt perfekt.
– Vi var kjempenøgde med dansinga då vi gjekk av golvet, det var ei skikkeleg god kjensle, seier ho.
Det skulle vise seg at det heldt til VM-gull framfor eit polsk og eit amerikansk par.
– Har du opplevd noko liknande før?
– At taket dett ned? Nei. Men eg opplevde at ein gong at scene datt ned litt, nokre plater i golvet knakk saman, fortel ho.
Vil til Idrettsgallaen
Jappée kom heim frå Polen med to bronsemedaljar og ein fjerdeplass i tillegg til gullet.
Det kan kome godt med for å få oppfylt hennar store ønskje: Å kome til Idrettsgallaen på nyåret.
– Eg har alltid følgt med på Idrettsgallaen. Dans er ikkje ein idrett som er veldig mykje i media, og det hadde vore moro berre å vere der, seier Jappée.
Ho har tre VM-titlar og fire EM-titlar å slå i bordet med dette året. Det kan ha betydning for nominasjon.
I 2015 og 2016 var ho Noregs mestvinnande utøvar uansett idrett. Då blei ho foreslått av Tom A. Schanke. Men ho blei ikkje nominert av sitt eige forbund, derfor kom ho ikkje på den offisielle lista.
Det håpar ho endrar seg i år. Jappée fyller 20 år 22. desember.
Kanskje blir nominasjonen årets bursdagsgåve.