Ledecky, som av mange blir rekna som den beste kvinnelege symjaren nokosinne, har vore fullstendig overlegen under VM i Budapest.
Under 1500 meter på tysdag var amerikanaren så suveren at ho måtte vente 14 sekund etter målgang før Katie Grimes frå USA sikra andreplassen.
TV-opptaka som viser Ledecky som ventar på konkurrentane, har vekt oppsikt over heile verda. Fleire medium konkluderer, kanskje litt spøkefullt, med at ho vart lei av å vente.
– Ho såg ut som om ho kjeda seg medan ho venta, skriv den amerikanske sportsnettstaden SB Nation.
Den australske sportsnettstaden news.com meiner 1500 meteren demonstrerte kor suveren Ledecky er.
– Symjeverda lét seg imponere då TV-kameraa med brutale detaljar viste nøyaktig kor uvanleg denne stjerna er, skriv nettstaden.
Katie Ledecky blir rekna av mange som den beste kvinnelege symjaren i verda no.
Foto: FERENC ISZA / AFP– Heilt suveren
Statistikken taler det klare språket sitt når det gjeld Ledeckys prestasjonar. Ho står med dei 13 raskaste tidene nokosinne på 1500 meter fri.
Ledeckys tid i VM (15.30,15) er rett nok nesten 10 sekund unna hennar eigen verdsrekord. Det er likevel meir enn åtte sekund raskare enn nokon andre har sumt distansen.
NRKs symjeekspert, Aleksander Hetland, meiner Ledecky er på eit heilt eige nivå.
– Ho er heilt suveren på langdistanseøvingane, seier Hetland, som karakteriserer henne som den beste kvinnelege symjaren i verda i fri-øvingane.
– Alle idrettar treng nokon som bryt barrierar, fortel den tidlegare symjaren.
Hetland påpeikar at 14 sekund på ein 1500 meter som tek 15 minutt ikkje er unikt.
– Eg har sett det før.
Han understrekar likevel:
– Det viser berre at ein er heilt suveren, kommenterer han.
Aleksander Hetland er NRKs symjeekspert.
Foto: Håkon Mosvold Larsen / NTB– Det er ganske vilt
Gullet var Ledeckys 17. VM-gull, men seinare i VM vart det eit nytt gull saman med USAs lag på 4 x 200 meter.
Med dei 18 VM-gulla sine har ho dermed like mange edle medaljar som ei anna symjestjerne frå USA, Ryan Lochte. Ho har til saman 21 VM-medaljar og er no den kvinna som har vunne flest medaljar i VM.
25-åringen har vunne gull i dei tre øvingane ho har konkurrert i under verdsmeisterskapen, med individuelle sigrar på både 400 meter og 1500 meter fristil.
– Det er ganske vilt. Eg føler at det var i går at eg var i Barcelona på mitt første VM, sa 25-åringen etter sigeren på 1500 meteren.
16 år gamle Grimes frå USA vart elles den nest yngste medaljevinnaren på 1500 i eit VM sidan nettopp Ledecky vann på distansen i 2013.
– Å dele denne augneblinken med henne er veldig spesielt, sa Ledeck.
