Avslører uvanlege grep frå Englands stjernetrenar: – Det kjendest litt rart

– Ho er fantastisk. Ho er veldig roleg og får det beste ut av deg, både som kollektiv og som lag. Ho har alltid eit smil om munnen og pressar oss alltid mot å bli betre, samanfattar forsvarsspelar Millie Bright til NRK.

Sidan Sarina Wiegman tok over som landslagstrenar for England har «The Lionesses» skote fart. Ho vart tilsett for å vinne EM på heimebane, men ho hadde dårleg tid. Frå ho gjekk inn rolla som landslagssjef var det ni månader til meisterskapsstart.

Men det var ikkje taktikk, formasjonsterping og teknikktrening som stod øvst på prioriteringslista til Wiegman. Ho ville dykke ned i bakgrunnen, tankane og kjenslene til spelarane.

– Ho vil kjenne deg som person, ikkje berre som spelar. Vi blir skikkeleg kjende som lag. Det gjer at når det er tøft ute på bana, så kjem ein skikkeleg saman og spelar for kvarandre, seier Bright.

– Alt handlar om å prestere på bana, men eg trur at når du kjenner spelaren betre, kjenner til bakgrunnen deira og korleis dei er, så er dei lettare å trene, seier Wiegman til NRK.

Skodespel og biffmiddag

Wiegman har alltid ønskt å vere så nære spelarane som mogleg. Som nederland-sjef gav ho alle spelarane ein artikkel med namnet «13 ting du burde gi opp for å bli suksessfull» i oppkøyringa til EM-triumfen i 2017.

I tillegg vart spelarane bedne om å uttrykkje kva suksess var for dei på ein kreativ måte. Nokon gjorde det med ein redigert film, andre med eit skodespel, skriv The Guardian.

Sjølv gjer ho drastiske ting for å behalde det tette bandet til spelarane. Då Nederland tapte mot Noreg i VM-kvalifiseringa i 2018, bestemde Wiegman seg for å besøkje nokre av spelarane.

Ho flaug til både London og Barcelona, og leigde bil for å køyre til Montpellier. Der møtte ho Anouk Dekker. Ho viste Wiegman rundt i byen før dei åt middag saman.

– Det kjendest litt rart å ete åleine med landslagssjefen. Då ho bestilte biff, kjende eg at eg også måtte bestille biff. Då biffen kom tenkte eg: Den der var stor! Men Wiegman, endå så låg som ho er, overraska meg med å ete heile biffen, seier Dekker til den britiske avisa.

Hest og barndomshistorier

Dei utradisjonelle grepa til Wiegman har også fungert som engelsk landslagssjef. Ho er framleis utan tap med det engelske landslaget, og slo ut EMs favoritt Spania i kvartfinalen.

Banens beste i den kvartfinalen var Bright, som fortel om dei djupe samtalane med landslagssjefen.

– Eg fortalde barndomshistorier og om kjærleiken for hestesport. I tillegg litt om livet utanfor bana.

For det var hestesport Bright satsa på i ung alder. Foreldra eigde fleire hestar i utkanten av Sheffield der ho vaks opp. Spesielt dressur var Bright interessert i, noko ho har skrive om for BBC. Men valet fall på fotball då Chelsea ville hente ho som 20-åring. Fram til då hadde ho berre spelt semiprofesjonelt.

Dette er ein av dei mange historiene Wiegman har fått høyre frå spelargruppa.

– Å bli kjent med dei fort utanfor bana kan vere vanskeleg. Vi er på bana saman heile tida. Frå september til no, så ser du dei spele heile tida. Vi prøver berre å møtast og snakke om fotball, for fotball fører folk saman, seier Wiegman og legg til:

– I tillegg er det lettare for spelarane å vere saman, og når du trivst i selskapet til kvarandre, trur eg det er lettare å prestere på bana og.