Markeng ut på båre etter fall – men ikkje beinbrot

I kveld får NRK vite av sportssjef Clas Brede Bråthen at det ikkje er brot. Markeng reiser heim saman med resten av laget måndag, og skal rett til MR-undersøking i Oslo.

– Nei, nei, la oss håpe det ikkje er kneet, sa NRK-ekspert Johan Remen Evensen rett etter fallet.

Aasen Markeng levert eit langt hopp på 131 meter, men rett etter landinga fall han stygt i høg fart. Han vart liggande lenge og vri seg i smerte, før han vart frakta ut på båre.

Etter falle heldt han seg til kneet, og i videoen såg det ut som han fekk ein vriding i kneet under fallet.

I unnarennet vart det heilt stille hjå publikum.

– Eg veit ikkje. Eg må sjekke, svarte Aasen Markeng på spørsmålet frå NRK om han frykta at det er korsbandet.

– Det var det første eg tenkte, men eg håpar ikkje det.

Han vart køyrt vekk frå hoppbakken i ambulanse.

Hoppsjefen måtte vri seg vekk

Johann André Forfang hadde akkurat hoppa og stod i målområdet, då han såg lagkameraten falle stygt.

– Det er veldig ubehageleg og kjedeleg. Ser jo at det ikkje gjekk heilt bra. Eg såg han kom sklidande ut, seier Johann André Forfang til NRK.

Hoppsjef Clas Brede Bråthen måtte vri seg vekk, då NRK synte han bilete av fallet.

– Det er heilt jævlig å sjå. Det ser ut som kneet får ei vriding som vi har sett for mange gonger dei siste åra på utøvarane våre. Vi får verkeleg håpe at det ikkje er det vi frykta.

Ifølgje Bråten har 19-åringen vore ute med same type skade, som dette kan vere, tidlegare.

– Det er berre vondt. No veit eg at han blir tatt vare på av det beste medisinske apparatet som er å oppdrive i denne regionen, og får tett oppfølging av vår fysioterapeut heile vegen. Det er vel ikkje lang tid før vi er i kontakt med ekspertisen heime i Norge heller når vi har fått ein oversikt over kva som kan ha skjedd.

Trenar Alexander Stöckl opplyser at det vil blir tatt røntgen av kneet til ungguten i kveld, men ein vil ikkje få gjennomført MR som kan avsløre om korsbandet er råke, før dei er tilbake i Norge i morgon.

– Status er han ikkje har vondt lenger. Om det er bra eller dårleg er vanskeleg å sei.

Lindvik på pallen

Trass skaden til Aasen Markeng, leverte fleire av dei norske utøvarane gode hopp. Marius Lindvik hoppa 134,5 meter og sikra seg karrierebeste med ein sterk 3.-plass.

– No har eg det jævlig bra. Endeleg får eg kome på pallen. Dette er sjukt gøy, sa Lindvik til NRK.

Og sjølv om det var ein skår i gleda at lagkompisen var sendt til sjukehus etter det stygge fallet.

– Ja, veldig kjedeleg. Alle gutane tok det tungt.

For den norske hopptrenaren vart det også ein spesiell dag i den tyske hoppbakken.

– Det er ein rar dag. Den fantastiske innsatsen til Lindvik og så har du skaden på den andre sida. Skal du glede deg eller vere trist?, spør Stöckl seg sjølv.

Johann André Forfang tok ein sjuandeplass, medan Robert Johansson enda på plass nummer 11.

Daniel-André Tande fekk det ikkje til i dag og måtte ta til takke med ein 18.-plass. Robin Pedersen kvalifiserte seg ikkje til finaleomgangen.

Ryoyu Kobayashi vann hopprennet føre austerrikaren Stefan Kraft.

Uhell på uhell

Aasen Markeng er ikkje den einaste hopparen som har vore uheldig denne helga i Tyskland.

Daniel-André Tande skada seg i ankelen, då ein ski kom flygande og trefte han under prøveomgangen fredag. Han måtte difor stå over lagkonkurransen i går.

Aasen Markeng frå Lensbygda leverte sin beste prestasjon i karrieren, då han hoppa inn til ein sterk 5.-plass i Russland sist helg.

Dette etter at han var uheldig og hadde blitt sendt heim frå Russland tidlegare i veka, fordi han ikkje hadde gyldig visum.