– Proffane køyrde det dei hadde og klarte likevel ikkje å hente han inn. Det er vanvittig sterkt, seier sportssjef i Team Sparebanken Sør, Atle Kvålsvoll til NRK.
Vangstad sette inn eit rykk to kilometer før mål på den 174 kilometer lange etappen frå Flå til Eggemoen.
– Han er ein perfeksjonist
Luka han fekk heldt heilt til mål. Dermed slo han proffløparar som Alexander Kristoff og Edvald Boasson Hagen.
– Andreas er ein perfeksjonist, roleg, om ikkje beskjeden så er han veldig målbevisst og strukturert, seier Kvålsvoll.
Tidlegare verdsmeister Thor Hushovd er mektig imponert.
– Eg sat og såg det på tv, og det er heilt fantastisk. Det er ein fantastisk prestasjon. Det er det ingen tvil om. Og så er det kult at han torer å gå til slik han gjer, seier Hushovd til Fædrelandsvennen.
Ukjent for Kristoff
– Det einaste eg veit er at han dreiv med orientering eller noko for nokre år sidan. Det er imponerande at han allereie no vinn ein etappe mot så mange proffar, seier Alexander Kristoff.
– Har vi ein framtidig proff der?
– Det er fullt mogleg. Presterer han i fleire løp framover er det fullt mogleg at han er proff neste år. Eg har ikkje høyrt så mykje om han før, så eg er jo litt overraska, men eg veit at det er fullt mogleg viss du er sterk. I dag viste han at det er mogleg, seier Kristoff om sørlendingen.
Førebur seg på Google Maps
Før etappesigeren i Tour of Norway stod sykkeltalentet med ein 7. plass på tempo i junior-VM som sin beste prestasjon.
– Dette viser at han ikkje berre er ein temporyttar. Han har taktisk kløkt i tillegg til køyrestyrke. Det er ein bra kombinasjon, seier Kvålsvoll.
Kvålsvoll avslører også at Vangstad brukar Google Maps i forkant av løp.
– Han les seg opp på løypene og kjenner kvar meter av løypene, seier han.