– Skal vi vere med å kjempe om medalje må vi vinne i dag og slå ein av gullfavorittane. Vi har ikkje vore på topp i det siste og har mangla litt rytme og utteljing. Vi må vise oss frå ei god side om vi skal slå Elverum, seier Gautestad til NRK.
– Går utover sjølvtilliten
Etter tre strake kampar utan siger slo ØIF Arendal botnlaget Haugaland i helga. Men trenaren meiner at laget ikkje er tilbake i godt gammalt slag.
– Først og fremst set vi ikkje ballen i mål. Det går utover sjølvtilliten. Vi trenar bra og har bra trøkk på trening, men vi skyt for dårleg. Det går bra i treningssituasjon, men i kamp misser du fort sjølvtillit, seier han.
– Det blir få som tek ansvar. I dag håpar eg vi får ein ketchupeffekt. Vi har over tid trykt og trykt. No håpar eg vi får full utblåsing, med spelarar som sprudlar og set ballen i mål, og jobbar knallhardt defensivt, seier Gautestad.
Elverum toppar tabellen før onsdagens seriekamp og er ein av dei heitast gullfavorittane i eliteserien.
Trur på tøff kamp
I haust spelte laga uavgjort då dei møttest i Hamar OL Amfi.
– Vi må jobbe med å gjere ting enkelt. Vi er dyktige nok, men vi må tru på det sjølv, så vil ting komme, seier han.
– Eg trur det blir ein tøff fysisk kamp der begge lag er dyktige i forsvar. Begge har gode målvakter, og det er viktig at vi klarar å setje ballen i mål, seier trenaren.
