Snowboardeliten hyllar Hovden

Då eit av verdas største snowboardmagasin nyleg skulle spele inn nokre av scenene til ein ny snowboardfilm falt valet på Hovden Alpinsenter i Aust-Agder.

Med seg på laget hadde Transworld snowboarding landslagsprofilane Ståle Sandbech og Aleksander Østreng. Sandbech skryt av Hovden.

– Eg vil tru at det er den beste parken i Noreg. Eg blei heilt overraska, og tykkjer det er rart at eg aldri har vore der før.

• Les også: Sandbech sikra VM-bronse - vurderte å droppe konkurransen

Hovden framfor USA

Det var parkbyggar og presseansvarleg ved alpinparken, Kris Kristensen, som foreslo Hovden for landslagskøyrarane.

– Eg møtte dei under eit anna oppdrag, og fortalde kva Hovden kunne by på. Dei ville prøve noko nytt og tok turen til oss.

Han seier det kan ha mykje å seie for alpinsenteret i framtida.

– Vi får vist fram Hovden som eit snowboardparadis.

Sandbech omtalar også Hovden som eit paradis for brettkøyarar, og seier han vil vie meir tid til trening i heimlandet enn han har gjort tidlegare.

– Når eg ser slikt så opnar det auga for at eg kan vere meir i Noreg om vinteren, og eventuelt vere på Hovden å trene i staden for å dra til USA.

• Les også: – Jeg er både glad og skuffa

Hemmelege opptak

Ifølgje Kristensen er opptaka som vart gjort i byrjinga av mai hemmelege, og vil først visast til publikum når filmen lanserast på nett til hausten.

Sandbech seier hemmeligheitskremmeriet grunnar i at det vart bygd ekstraordinære hopp i samband med filmen, med element som ikkje er ordinære.

Destinasjonssjef hos Fjellbyen Hovden, Lasse Eidskrem, seier den positive omtalen kan hjelpe alpinanlegget å plassere seg på vinterkartet.

– All PR er god PR, og det at slike profilar i dette miljøet har lagt filminga til Hovden trur eg er veldig positivt.

Film til inspirasjon

Fred Arne Wergeland frå Kristiansand har arbeidd med skifilmar i over ti år. Han har blant anna jobba som fotograf i TV-programmet 71 grader nord og Amazing Race, og vann i 2014 ein gjev pris i den amerikanske filmfestivalen «Coldsmoke Awards».

Han fortel utøvarane kan bruke fleire månadar på å få dei beste triksa på film.

– Utøvarane held gjerne på ein heil vinter for få til eit segment som varar nokre få minutt.

Wergeland seier filmar om vintersport kan vise kva nivå utøvarane ligg på - til inspirasjon for andre.

– Slike filmar er kanskje ikkje kjempeinteressant for eit stort publikum, men for dei som er veldig interesserte så ser dei kor lista ligg, og kva dei beste i verda har fått til i løpet av ein sesong.

Sjå tidlegare laga video av Snowboardforbundet med det norske snowboardlaget:

• Les også: Jakter på de beste tv-øyeblikkene