Flekkefjord:
I Flekkefjord får Torbjørn Klungland fornya tillit etter at Frp har gjort eit kjempeval, med nesten 50 prosent av stemmene.
Kvinesdal:
I Kvinesdal fortset Per Sverre Kvinlaug (KrF) som ordførar.
KrF gjekk fram 2,6 prosentpoeng til 28,4 prosent. Næraste konkurrent var Framstegspartiet, som enda med 22,5 prosent av stemmene. Arbeidarpartiets Ahmed Lindov blir varaordførar.
Hægebostad:
Senterpartiet har hatt ordføraren i Hægebostad dei siste åra. Det kan det bli ei endring på no. Høgre får 31,7 prosent, fram 11,7 prosentpoeng og er kommunens største parti. Dermed kan truleg partiets Jan Petter Gysland tar over ordførarklubba.
Lyngdal:
Frp gjorde eit brakval i Lyngdal med 32,7 prosent, fram 21,3 prosentpoeng samanlikna med valet for fire år sidan. Truleg ser det lyst ut for Unni Nilsen Husøy som ny ordførar i Høgre-bastionen. Høgre gjekk kraftig tilbake under årets val.
Åseral:
I Åseral har Arbeidarpartiet styrt skuta dei fire siste åra. Dei er størst også etter årets val, og kan danne fleirtal med Senterpartiet. Dermed held truleg Inger Lise Lund Stulien fram som ordførar.
Vennesla:
Eivind Drivenes (Sp) blir ny ordførar i Vennesla. Som varaordførar får han med seg Odd Grønberg (H).
I Vennesla har KrF hatt ordføraren sidan 1989.
Det var mykje som tyda på at den sittande ordføraren Nils Olav Larsen (KrF) ville halde fram. Men valresultatet viser at KrF miste eitt mandat. Dermed overtek Senterpartiet ordførarkjeda.
Bykle:
Arbeidarpartiet har styrt Bykle dei fire siste åra. Slik blir det også dei neste fire åra. Hans Blattmann blir ny ordførar for første gang. Ap har inngått eit valteknisk samarbeid med Høgre og KrF.
– Eg er audmjuk, men gler meg. Det blir moro å ta fatt på dette. Det er ei tillitserklæring at folk vil ha deg som ordførar. Eg håpar eg kan bidra til å utvikle kommunen vidare. Eg gler meg til å ta fatt på jobben, seier Blattmann til NRK.
Valle:
Lars Tarald Myrum (Sp) blir ny ordførar i Valle. Han tek over etter Steinar Kyrvestad (Ap).
Margit Dale, også ho frå Senterpartiet, blir varaordførar.
Senterpartiet har inngått eit valteknisk samarbeid med Arbeidarpartiet.
Bygland:
Runar Granheim (Ap) tar over som ordførar i Bygland etter partikollega Sigbjørn Fossdal. Tor Kasin (Sp) blir varaordførar.
Partia har inngått et politisk samarbeid om fordeling av verv.
Evje og Hornnes:
Morten Haraldstad (KrF) blir ny ordførar i Evje og Hornnes kommune. Finn Bjørn Rørvik (H) fortset som varaordførar.
Det er klart etter at Høgre, KrF og Venstre er blitt samde om et valteknisk samarbeid.
Arbeidarpartiet er framleis det største partiet, trass i klar tilbakegang frå førre val.
Iveland:
Jan Andre Myhren (H) blir ny ordførar i Iveland. Høgre er samde med Arbeidarpartiet og Frp om eit valteknisk samarbeid.
Dermed er det slutt på over 30 år med ordførar frå Senterpartiet eller KrF i kommunen.
– Vi vil prøve å få til ei ny retning for innbyggjarane våre. Vi har hatt godt og vel 30 år med Senterpartiet og KrF, og no har vi lyst på ei ny retning, seier Myhren til NRK.
Linda Skripeland (Ap) blir varaordførar i kommunen.
Åmli:
Det vil ta minst ein veke før det avgjerast kven som blir ordførar i Åmli. Høgre, som er på vippen, har kalla inn til et møte neste torsdag for å drøfte om partiet skal støtte noverande ordførar Bjørn Gunnar Baas (Sp) eller Arbeidarpartiets Hans Fredrik Tangen.
I Åmli går det mot skifte. Senterpartiets Bjørn Gunnar Baas har vore ordførar dei siste fire åra. Arbeidarpartiet overtek no som det største partiet i kommunen med 39,9 prosent. Dermed kan det vere duka for Hans Fredrik Tangen som ny ordførar. Han har tidlegare vore varaordførar i kommunen for Høgre, før han melde overgang til Ap i førre periode.
Kristiansand:
I Kristiansand har Høgre gjort eit kjempeval med 29 prosent av stemmene, ein oppgang på 11,2 prosentpoeng frå 2019.
I sørlandshovudstaden blir nykommaren Mathias Bernander ordførar. Han får med seg KrFs Charlotte Beckmann Finnestad som varaordførar. Med Frp på laget har partia 50,5 prosent av stemmene.
Birkenes:
Tidlegare ordførar Arild Windsland (H) tek på nytt over ordførarstolen i Birkenes etter forhandlingar tysdag.
Det seier den påtroppande ordføraren til NRK.
– Det kjennest bra. Eg har jo vore i jobben før, så eg veit at det både blir krevjande og givande. Denne fasen med forhandlingar er alltid stressande, der du må ta nokre avgjerder på strak arm, men det er godt når ein er litt ferdig med det og kan senke skuldrene og konsentrere seg om det som skal skje framover, seier Windsland.
Han var ordførar i kommunen frå 2011–2015.
I Birkenes fekk Høgre 27,3 prosent av stemmene. Det er ein oppgang på 5,3 prosent frå 2019.
Winsland tek over ordførarjobben etter Senterpartiets Gyro Heia.
Sirdal:
Jonny Liland (Ap) fortset som ordførar i Sirdal, skriv avisa Agder.
Isak A. Liland (H) fortset som varaordførar.
Arbeidarpartiet, Høgre, Venstre og Framstegspartiet er einige om et samarbeid etter valet.
Lillesand:
Lillesand har vore styrt av Høgres Einar Holmer-Hoven og det held fram dei fire neste åra.
Høgre vart det største partiet med 29,6 prosent av stemmene. No skal partiet samarbeide med Pensjonistpartiet, Framstegspartiet, Kristelig Folkeparti, Senterpartiet og Venstre. Til saman har dei 18 av 27 representantar.
Oddbjørn Kylland blir varaordførar.
Tvedestrand:
Også i Tvedestrand er det Høgre som har regjert dei siste fire åra. Slik blir det også i dei fire neste. Marianne Landaas (H) sitt parti fekk 32,3 prosent av stemmene, ein framgang på meir enn 10 prosentpoeng.
Agderposten skriv tysdag kveld at forhandlingane er ferdige, og at Landaas får fortsette som ordførar.
Vegårshei:
I Vegårshei kommune kan det gå mot maktskifte. KrF er framleis det største partiet med 36,1 prosent. Men Arbeidarpartiet og Senterpartiet kan danne fleirtal i det nye kommunestyret.
Dermed kan Aps Arne Lindtveit bli ordførar. KrFs kandidat er Kjetil Torp, som altså er sitjande ordførar.
Det ventast tidlegast ei avklaring torsdag.
Gjerstad:
I Gjerstad held får ordførar Steinar Pedersen (H) fornya tillit i fire år til. Kvar tredje stemme har gått til partiet.
Pedersen kom inn som varaordførar for Inger Løite ved førre val. Etter Løite trakk seg frå politikken, har han hatt ordførarkjeda, skriv austagderblad.no.
Farsund:
I Farsund blir det bytte av ordførar. Arbeidarpartiets Arnt Abrahamsen, som har vore ordførar i to periodar, må gje ifrå seg ordførarkjeda til Frps Ingrid Merethe Williamsen.
Lindesnes:
Frps Alf Erik Andersen blir ny ordførar i Lindesnes.
– Vi har inngått et valteknisk samarbeid med Høgre, Ap, Senterpartiet og Industri- og næringspartiet, seier han.
Lindesnes kommune har vore styrt av Arbeidarpartiet dei siste fire åra.
Arendal:
I Arendal går det mot ein ny periode med Robert Cornels Nordli frå Arbeidarpartiet. Ap gjorde eit sterkt val og gjekk fram fire prosentpoeng til 30,7 prosent.
Grimstad:
I nabokommunen Grimstad blir det heller ingen endring på ordførarkontoret.
Høgres Beate Skretting held fram, etter at partiet fekk 24,4 prosent av stemmene og er det største partiet i kommunen.
Risør:
Kai Magne Strat frå Høgre blir ny ordførar Risør.
Høgre og Arbeidarpartiet er like store etter årets val, men allereie før midnatt blei det klart at Høgre, Venstre og Frp sørger for borgarleg fleirtal.
Froland:
I Froland blir Inger-Lene Håland (Ap) kommunens første kvinnelege ordførar nokosinne. Det blei klart etter forhandlingar i natt, meldar partiet.
KrF, som har ordføraren i dag, er nest størst med 21,9 prosent, og får varaordføraren.
