Sensor skal førebyggje pipebrann

– Eg vart litt nysgjerrig. For min del er det jo ein auka tryggleik. Vi fyrer jo mykje, mykje meir no enn det vi har gjort tidlegare, seier Magne Langseth.

Huseigaren i Mandal har som så mange andre brukt peisen som varmekjelde nummer éin i vinter.

Sjølv om risikoen for pipebrann er liten i det nye huset hans, er han med i eit pilotprosjekt for å førebyggje nettopp dette.

Han tok sjølv kontakt etter at han såg ein annonse i lokalavisa der dei søkte etter frivillige.

Førre veke fekk han montert ein liten svart boks på pipa. Frå den vesle boksen går ein sensor inn i skorsteinen og varslar dersom temperaturen blir for høg.

– Det kostar meg jo ingenting. For det andre giret det jo brannvesenet informasjon som dei kan bruke i arbeidet sitt.

Det var Lindesnes Avis som først skreiv om saka.

Mykje informasjon frå ein liten boks

Fleire brannvesen rundt om i landet er med på pilotprosjektet, som er eit samarbeid med teknologiselskapet Airmont.

I tillegg til Brannvesenet Sør, har Airmont inngått avtale med Bjørnafjorden Brann og redning utanfor Bergen.

I Halden er det bestilt sensorar til alle piper i kommunen.

Målet er først og fremst å finne ut av når det er eit reelt behov for å feie pipa.

– I staden for å gå rundt å feie på masse reine skorsteinar som vi har gjort før, så vil denne kunne seie frå når det er behov for å feie neste gong, seier Torbjørn Høyland.

Avdelingsleiaren i Brannvesenet Sør fortel at kunstig intelligens kan berekne behovet ut frå fleire faktorar som temperatur, eller kva slags skorstein eller eldstad ein har.

– Og så vil han i tillegg kunne seie frå viss temperaturen byrjar å bli så høg at det er fare for pipebrann.

Boksen har ei levetid på åtte år. Den er støypt i plast, for at ho skal vere fullstendig verna mot vêr og vind.

Auke i pipebrannar

Tal frå Brannvernforeningen viser at talet pipebrannar aukar. I 2021 vart det registrert 1596 pipebrannar i Noreg, 468 fleire enn i 2020.

I tillegg er det mange som ikkje blir registrert, fortel Anders Kristoffersen som er driftsansvarleg i Brannvesenet Sør.

– Det er ofte naboar som oppdagar det. Anten ved at dei ser det brennar, eller at dei luktar det.

I løpet av det neste året er målet at rundt 1000 piper i Agder skal få ein eigen sensor. I Halden er talet 12 000.

Det kan vere til stor hjelp for brannvesenet i arbeidet sitt, og kan forhindre at pipebrannen i verste fall utviklar seg til å bli ein bygningsbrann.

– Jo tidlegare ein brann blir avdekt, jo tidlegare kan vi vere på plass, og jo meir førebyggjande arbeid kan vi få gjort, seier Kristoffersen.

I peisen til Magne Langseth kjem det til å vere høg temperatur ut vinteren, og då er sensoren kjekk å ha.

– Vi merkar jo ingenting til at han er der, og fyrer som vanleg. Eg er veldig takksam for at eg fekk vere med på prosjektet.