Årets russekull arrangerer treff mot narkotika

– Eg ønskjer ikkje å sjå dei rundt meg ta narkotika fordi det er farleg. Det er viktig for meg, seier Jesper Werner Jørgensen.

Han er russepresident ved Kvadraturen vidaregåande skule i Kristiansand.

Denne veka lanserte elevane ved skulen ein kampanje mot narkotika. Elevane meiner det er eit stort problem.

– Narkotika bidreg ikkje til samhald. Det gjer ikkje russetida noko betre, seier Jørgensen.

Han får støtte frå kollegaen sin i russestyret, Leon Skeie Holde.

– Det er heilt krise, altfor mange russ bruker narkotika, om det er hasj eller kokain.

Møtet på Kvadraturen var det første av fleire slike møte i Agder.

Alle russ får

Tredjeklassingane på Kvadraturen vidaregåande skule har også overtalt produsentar av russedressar til å vera med på kampanjen.

På møtet som vart halde denne veka vart det delt ut klistremerke med oppmoding om å seia nei til narkotika.

Desse klistremerka blir no lagde med alle pakkar som russedressprodusentane sender ut.

– Alle russ i Noreg vil få det, seier russepresident Jørgensen.

Heiar på ungdommen

Politiet er glad for å få draghjelp i kampanjen mot narkotika, og heiar på initiativet til russen.

– Me synest dette initiativet er kjempebra, og me håpar me kan få til eit endå betre samarbeid seier Maida Årvand, politibetjent i førebyggjande eining.

Kristiansand-ordførar, Mathias Bernander (H), heiar også på kampanjen til ungdommane.

– Dette fortel meg at me har veldig samfunnsmedvitne ungdommar som ikkje ønskjer at narkotika skal vera ein del av ungdomskulturen, seier han.

Han meiner at det er utruleg mange gode grunnar til å seia nei til narkotika.

– Det er usosialt, dårleg for klima og dårleg for helsa. Dette er ein bransje som tiltrekkjer seg mykje av det ungdommen er imot, seier Bernander.