– Eg synest berre det skulle mangle at ein sa ja til dette, difor blei eg litt overraska over at ein plutseleg sa nei.
Det seier varaordførar Eivind Arnt Husøy (Ap). Han er skuffa over at ordføraren, som han også er gift med, sette foten ned for å få regnbogeflagget opp.
Bakgrunnen er at Lyngdal pride har søkt om å få heise flagget på kommunen si flaggstong i samband med eit Pride-arrangement laurdag 15. juni, slik dei har gjort før.
Men det seier nåverande ordførar nei til, kunne Lister 24 først melde.
Ordføraren i Lyngdal vil at kommunen sine flaggstenger primært nyttast til det norske og det samiske flagget eller andre offisielle flagg.
Foto: Per-Kåre Sandbakk / NRKOrdførar Unni Nilsen Husøy (Frp) utdjupar i ein e-post til NRK.
– Eg har som ordførar berre sagt nei til å heise pride-flagget i offentleg flaggstong, ikkje til markeringa eller flagging andre stader. Debattar som dette er ofte vanskelege da ein blir pålagt meiningar ein ikkje har, noko ein ser i kommentarfelt og i diskusjonar.
Ordførar Unni Nilsen Husøy (Frp) vil ikkje delta i pride: – Men eg håper absolutt at dei får eit flott arrangement og ønskjer dei lukke til med markeringa.
Foto: Svein Sundsdal / NRK
Meiner flagget splitter
Ordføraren skriv vidare at ho alltid har hatt stor sympati med alle menneske som kjenner på utanforskap og diskriminering. Ho synest derimot at utviklinga går feil veg.
– Utviklinga som har vore dei siste åra har gjort at regnbogeflagget, som no blir omtalt som pride-flagg, har blitt meir splittande enn samlande. Ei offentleg flaggstong skal ikkje skape splitting, den skal gi oss samhald.
Heise eller ikkje heise? Det er spørsmålet i fleire kommunar i landet no.
Foto: Petter LarssonSkuffa
Lyngdal pride legg ikkje skjul på at dei er skuffa over avslaget frå ordføraren.
– Sjølvsagt er vi skuffa over avslaget. Det er mykje vanskelegare å vere skeiv på bygda enn i storbyar, seier Kristi Foss i pride Lyngdal.
Ifølgje komiteen er markeringa ikkje meint for å provosere, men for å inkludere.
– Vi håper flest mogleg møter opp, feirar mangfaldet og markerer dagen, seier Foss.
Regnbogeflagget har ikkje noko å gjere på kommunen sine flaggstenger, meiner ordføraren i Lyngdal.
Foto: Simon Skjelvik Brandseth / NRKSamlar inn underskrifter
– Eg oppfattar at dei fleste har blitt gradvis meir positiv til pride og kva det står for både i verda, Noreg og til og med på Sørlandet, seier varaordførar Eivind Arnt Husøy (Ap)
Difor vil han no samle inn underskrifter for at spørsmålet kan komme opp som eiga sak på neste møte med politikarane den 13. juni.
– Ifølgje kommunelova treng ein minst 10 underskrifter for at ei sak skal takast opp som eige punkt. Det har eg fått lovnad om at eg får.
Eivind Arnt Husøy (Ap) trur at saka får nok underskrifter til å bli behandla som ei ordinær sak som må røystast over i kommunestyret.
Foto: Victoria Marie Nordahl / NRKOg for at flagget kan gå til topps under pride-markeringa laurdag 15. juni må minst halvparten av kommunestyret stemme for flaggheising.
Det vil i praksis seie 15 av dei 29 representantane.
– Kva meiner du som ordførar om underskriftskampanjen som varaordføraren har dratt i gang?
– Dette er ei hjartesak for varaordførar og Arbeidarpartiet der dei er usammde i ordførar si avgjerd, så er dette det verktøyet dei har for å omgjere vedtaket mitt. Eg har ingen problem med at dei løfter saka opp politisk, og så vil det bli opp til kommunestyret å avgjere.
Dei er usamde i saka om regnbogeflagget skal heisast, og tar difor den diskusjonen i kommunestyret og ikkje på heimebane. Biletet er tatt i samband med førre kommuneval.
Foto: Victoria Marie Nordahl / NRKSnakkar ikkje politikk heime
Ordførarparet prøver derimot og la dei politiske diskusjonane bli igjen i kommunestyret.
– Vi er begge klare på at vi har kvart vår ståstad, så vi prøver å overlate politikken til det offentlege rommet og heller prate meir om trening og barn heime, seier varaordføraren.
Og det er dei i det minste samde om.
– Her var vi jo veldig klare over at vi hadde forskjellige synspunkt. Vi har lært oss at det ikkje er spesielt heldig å diskutere politikk på heimebane, så den diskusjonen tar vi i kommunestyret, seier ordføraren.
Dei to politikarane prøver og ikkje diskutere politikk på privaten. Biletet er tatt frå ein tidlegare reportasje.
Foto: Victoria Marie Nordahl / NRK