Politiet åtvarar foreldre: – Rekrutterer unge som speler dataspel

– Dei som rekrutterer unge sit på dagtid og spelar dataspel online, for å finne ut kva barn som ikkje er på skolen.

Det sa Astrid Holm, seksjonsleiar for nærpolitiseksjonen i Oslo politidistrikt søndag ettermiddag, til heile landet på eit digitalt foreldremøte.

Dei siste vekene har vore prega av ei rekkje alvorlege hendingar med unge heilt ned i 13-årsalderen.

Minst 20 norske ungdommar blir knytte til valdsoppdrag i år.

Fleire av hendingane blir kopla til bestillingsvald og svenske kriminelle nettverk.

«Politiet ønsker difor å dele kunnskap om status, faresignal og utviklingstrekk foreldre bør vere klare over som eit ledd i å forhindre ny rekruttering av barn og unge til denne typen kriminalitet», var ordlyden i invitasjonen frå politiet.

Dette kan vere eit dårleg teikn

Holm sa eit vesentleg teikn er at barn plutseleg tar i bruk krypterte kommunikasjonsappar, som Telegram, WhatsApp, Signal og Zangi.

– Det er ingen grunn til at eit barn eller ein ungdom skal gå rundt med ein kryptert app på telefonen sin, seier Holm.

Ho kom difor med følgjande oppfordring:

– Bygg tillit til barnet ditt, slik at dei tør å fortelje det om dei opplever noko ubehageleg på nett. Du har ein rett og ei plikt til å følgje med på barnet ditt, sa Holm.

19 ran i Agder

I Agder har det dei siste vekene også blitt gjort mykje kriminalitet av unge menneske.

På dei ti første dagane i oktober rykte politiet ut til 19 ran i Kristiansand sentrum.

Politiet har ikkje sagt noko om at ransbølgja knyter seg til rekruttert kriminalitet blant unge.

Rana har likevel skapt utryggleik i sentrum, seier ungdommar NRK har snakka med.

Tidlegare i oktober fortalde NRK at politiet kjenner til at ungdom også i Agder får tilbod frå kriminelle. Dei leitar etter sårbar ungdom som ønsker å tene pengar, opplyser politiet.

Politiet har no sikta ti personar for rana den siste tida, og ser ikkje bort frå fleire pågripingar.

Nokre av dei sikta har kjennskap til kvarandre frå før.

– Dei pågripne er unge menn i tenåra eller tidleg 20-åra. Dei høyrer til i Kristiansand, men også andre kommunar i Agder, sa politistasjonssjef i Kristiansand Anders Hareide Holt til NRK førre veke.

Klede og verdigjenstandar er noko av det offera har måtte gi frå seg under rana.

Fryktar smitteeffekt

Politiet i Kristiansand meiner omtalen til media av ungdomskriminalitet den siste tida kan inspirere fleire til å gjere seg skuldige i lovbrot.

– Vi veit at nyheitsbilete som skjer internasjonalt og nasjonalt blir spreidd lokalt og at det i verste fall kan smitte over på andre. Det kan inspirere sårbar ungdom til å gjere seg skuldig i alvorleg kriminalitet.

Det seier leiar for førebyggande avdeling i politiet i Kristiansand, Anders Flottorp.

Også ungdomsarbeidar Hussein Al-Kharasani er redd det blir ein smitteeffekt når så mange ran skjer på så kort tid.

– Når du er blant ungdom og kan seie at du har rana og blitt sett i handjern, kan det smitte over på ein annan som vil ha den same spenninga, sa han til NRK førre veke.

Hussein Al-Kharasani meiner ein må sjå på årsaka til at ungdom ranar.

Han nemner sosialt press, og at mange ikkje har pengar til å kjøpe dei tinga dei ønsker seg.

Da blir alternativet å berre ta det.

– Dei skulle hatt tryggare vaksne og fleire arenaer rundt i Kristiansand der dei kan møtast. For å henge, for å ha det hyggeleg, for å skape god stemning.