– Vi ynskjer at folk skal lære meir om lauvskog og om moglegheitene og kvaliteten som finst i han.
Det seier dagleg leiar i Skogselskapet i Agder Hans Olav Gurebo.
Han har den siste tida vore med på å lære elevar på naturbrukslinja ved KVS Bygland å flytte eikeplantar.
Lauvtreprosjektet går blant anna ut på å auke kunnskapen om lauvskog og den viktige rolla ho har i det biologiske mangfaldet.
Flyttar plantar
Eikeplantar blir graven opp og blir flytta til eit nytt felt på Storegra Gård i Grimstad, der det no blir satsa på ein ny bestand av eiketre.
– Vi bruker stadeigne plantar og så satsar vi på å forynge bestanden litt, seier Gurebo i Skogselskapet i Agder.
Han seier skogselskapet er opptatt av å tenke på framtida.
– Lauvtreskog er veldig viktig både for det biologiske mangfaldet og fordi han gir liv og moglegheiter, seier Gurebo.
Ifølge han blir trea blant anna brukte i kjøkkeninnreiingar og møblar, og akkurat det blir meir og meir populært.
Vil bruke lokalt tømmer
Blant dei som ynskjer slike tiltak velkommen er snekker på Drange Snekkerverksted i Søgne Helge Ingebretsen.
Han skulle gjerne sett at dei kunne bruke lokalt tømmer framfor importert som dei gjer i dag.
– Det pratar vi mykje om. Det er nesten for gale at det skal vere sånn. Kunne vi fått tak i lokalprodusert trevirke, så hadde det vore fint, seier snikkaren.
Gurebo frå skogselskapet seier det har blitt satsa lite på lokalt tømmer dei siste åra og at dette er noko dei ønsker å endre.
– Vi ynskjer at vi skal få bruke meir lokale råvarer og lære folk til å tenke litt berekraft rundt dette, seier han.
Å flytte plantane engasjerer dei unge elevane, og blant dei Tønnes Skrudland Hetland:
– Det er flott. Det varierer litt med vêret, men det er det som er gøy med det òg, i alle fall nå når det begynner å bli litt varmare. For det er dette eg har tenkt å jobbe med, fortel han.