Fann 140 kilo dynamitt: Skulle brukast til fisking og grøftegraving

Heime hos éin av mennene vart det funne rundt 100 kilo dynamitt.

Dynamitten skulle brukast til fisking og grøftegraving.

Det seier forsvararen til mannen, Pål Christensen.

Politiet ønskjer ikkje å kommentere dette.

– Det som gjer oss bekymra, er dei store mengdene sprengstoff som er oppbevart på uforsvarleg vis, seier Helge Torsvik som leiar etterforskinga.

Mannen er busett i Tvedestrand. Dynamitten vart funnen heime hos han.

Sju personar arresterte

Politiet har òg funne sprengstoff i Arendal og Grimstad.

Det skjedde i samarbeid med bombegruppa frå Oslo.

Direktoratet for samfunnstryggleik og beredskap (DSB) hjelpte òg i aksjonen.

Funna førte til ei rekkje arrestasjonar. Alle dei sikta mennene er i 20-åra. Tre av dei er varetektsfengsla. Kvinna er i 30-åra.

Nokre av personane er kjende for politiet frå før av. Alle bur aust i Agder.

PST er varsla

Det var tysdag kveld førre veke at fire personar vart stoppa i Arendal.

Sjåføren var mistenkt for fyllekjøring. I bilen fann politiet eit ulovleg våpen. Det førte til at politiet ransaka fleire bustader.

Ein av dei var på Tromøy, der politiet fann dynamitt. Bombegruppa detonerte sprengstoffet ved Stoa i Arendal.

PST er rutinemessig varsla om saka, ifølgje Torsvik.

Det er ikkje mistanke om at dynamitten skulle brukast til ei terrorhandling.

Kan komme fleire arrestasjonar

Den same dagen som politiet fann dynamitt på Tromøy, fann dei òg dynamitt i Grimstad.

To dagar seinare skjedde det same i Tvedestrand.

Torsvik vil ikkje seie noko om kvar dynamitten kjem frå, eller kva den skulle brukast til.

Han ser ikkje bort frå at fleire personar blir arresterte i saka.