Båtkrasj utan lappen kan koste dyrt

– Vi ser på om det er årsakssamanheng mellom uhell og om du manglar kompetansen, som eit båtførarbevis har, seier pressetalsmann i Tryg Forsikring, Roald Stigum Olsen til NRK.no.

• LES: Test din båtkunnskap her
• LES: 50 000 mangler båtførerbevis

– I verste fall kan det medføre ei stor avkorting i erstatninga, seier han.

Ei oversikt frå Finansnæringens Fellesorganisasjon viser at det vart rapportert inn 9475 skader til forsikringsselskapa i fjor. Dette er ein nedgang på over 1200 skader frå året før.

Den same oversikta viser at det vart betalt ut over 413 millionar kroner i erstatning i samband med fritidsbåtulykker i fjor. I 2009 vart det betalt ut over 451 millionar kroner.

– Skilnad på liv og død

– Båtførarar kan få redusert erstatning etter til dømes ei grunnstøyting, dersom det viser seg at føraren ikkje har tilstrekkeleg kunnskap om til dømes navigering, seier assisterande informasjonsdirektør Emma Elisabeth Vennesland i forsikringsselskapet If.

– Til dømes dersom ein tek feil av raud og grøn stake. Slike ting lærer ein på båtførarkurset, legg ho til.

– På båtførarkursa får deltakarane ei realistisk og god opplæring, som kan vere ein viktig livreddar. Å bruke tid på å lese om båt eit par timar i veka, i staden for å spele dataspel, kan vere skilnaden på liv og død, seier Vennesland.

• LES: Nå kan båtlappen ryke

Tal frå Tryg Forsikring viser geografisk spreiing av båtulykkene. Men området frå Lindesnes til svenskegrensa peikar seg ut. Oversikta viser at heile 40 prosent av ulykkene skjer i dette området. Sjå og klikk på kartet under.

– Det var ein rein tabbe

– Det viser seg også at det ofte er erfarne sjøfolk, som kjem ut for dei alvorlegaste ulykkene. Dei vert gjerne litt nonchalante. Det er viktig å vere på hugget heile tida, seier Vennesland.

• SJÅ BILETA: Luksusyacht på skjær

Eit godt døme på at erfarne sjøfolk kjem ut for ulykker er yacht-ulykka i Lillesand 23. mai. Fleire redningsskøyter måtte dra den store båten laus etter at den gjekk på skjær i grunt farvatn.

– Det var ein feilbedømmelse, det er jo ikkje noko å skjule. Så det var ein rein tabbe, sa den tidlegare stortingspolitikaren og eks-presidenten i Redningsselskapet, Magnus Stangeland, som hadde chartra yachten.

I etterkant kom det fram at skipparen, som førte luksusyachten ikkje hadde sertifikat til å føre båten. Det er uklart kva følgjer dette vil få for mannen.

(Artikkelen held fram under kartet)

NRK.no trefte fleire personar på ulike båtplassar i Kristiansand. Dei meiner det er feil at berre personar fødd etter 1980 må ta båtførarprøva.

– Det er berre tull. Vi som er fødd før månelandinga har jo like mykje ansvar for å køyre vettugt, som dei som er fødde etterpå. Det vil nok bli endra etterkvart, trur Øystein Hærås.

– Det er berre å samanlikne med trafikken på land. Du kan jo ikkje setje deg i ein dyr bil og køyre, dersom du ikkje har sertifikat. Du har ikkje lov til å køyre. Slik burde det ha vore på sjøen også, seier Clas Falkum til NRK.no.

• LES: Prioriterer ikke båtførerbevis

– Ta båtlappen

Forsikringsbransjen rår alle, uansett alder, til å ta båtførarbeviset. Både med tanke på sjøsikkerheita og eventuelle forsikringsutbetalingar, dersom du skulle komme ut for ei ulykke.

– Det verkar som om det er liten samanheng mellom dødsulykker og båtførarbevis, sjølv om vi ikkje har full dokumentasjon på det, seier Stigum Olsen.

– Vi vil uansett rå folk til å ta båtførarprøva, seier han.

• LES: Kritisk til båtlappen

Stigum Olsen får støtte frå kollegaen i If Skadeforsikring.

– Vi oppfordrar alle til å ta prøva, sjølv om dei ikkje er forplikta til å ta båtførarprøva. Det gjev større sikkerheit og større trivsel til sjøs, seier Vennesland.