Auksjonerte bort i rasande tempo: – Selt

– Eg er nysgjerrig og må ha litt moro veit du. Det er jo litt av kvart i denne kassa.

Det seier Jan Rune Henriksen som hadde møtt opp på auksjonen. Han fekk tips om det som skulle skje tidlegare på dagen av ein kollega og hadde ingen planar om å kjøpe noko.

Saman med Henriksen var det eit par hundre menneske som hadde møtt opp for å sjå kva som var til sals av hittegods i Kristiansand.

Det var Namsfuten i Agder som heldt auksjonen.

– Nokon som seier 1000? Selt, ropte Per Juel Larsen som styrte auksjonen.

Tinga som blei selde var ein kombinasjon av attgløymde ting, og dessutan gjenstandar frå politiet.

Det var både verdifullt verktøy, båtmotorar, smykkar og mykje anna som var til sals på auksjonen i Kristiansand.

Det er ingen reklamasjonsrett og garanti for at varene fungerer.

– Eg trur det er eit røvarkjøp, seier Henriksen som betalte 400 kroner.

I kassa hans låg det både ein spikarpistol, stikksag og mykje andre verktøy.

Det var 230 bodrundar og det dyraste blei selt for over 10 000 kroner.

Gav bod for pappa

Det var klart flest menn til stades på arrangementet og nokre av dei vann bodrunden gong på gong.

To av dei som vann fleire bodrundar var Madelen Høyer Jonassen og pappa Morgan. Dei fekk med seg både verktøy og ein imac-maskin.

– Det er pappa som skal ha dei, fortel Madelen.

Dei sikra seg Apple-maskina for 2000 kroner. Om ho fungerer veit dei ikkje.

Pappa Morgan reknar med at han uansett er mykje meir verdifull enn prisen som dei betalte og at det dermed var verd å ta sjansen.

Må dokumentere

Tidlegare har det hendt at nokon har sett sine eigne ting ligge klare for å bli auksjonerte bort.

– Det har skjedd og da blir denne gjenstanden halden til side, seier Anita Andrå Andersen hos Namsfuten.

Som legg til at det må dokumenterast.

Det meste som skal auksjonerast bort har lege hos Namsfuten ei god stund..