– Vi hadde lyst til å plukke norske jordbær og så er det jo litt billigare å plukke sjølv enn å kjøpe i butikk, seier Andrea Kåsbøl.
Ho er på ferie på Sørlandet, der prisen på ei korg med ein halv kilo norske jordbær kosta 59,90 i fleire butikkar denne veka.
– Dei har vorte dyre. Det er litt i meste laget, men bøndene skal jo ha noko òg, seier kunde Thom Eilert Thorstensen.
Kan bli endå dyrare
Ifølgje VG kan ei korg med jordbær komme til å koste opp mot 80 kroner i butikk i sommar.
Det skal vere fleire grunnar til det.
– Det har vore eit lønnsoppgjer som var ganske stort og krona er svak. Ein må betale plukkarane meir for at dei skal få med seg like mykje pengar til heimlandet sitt, seier rådgivar i Grøntprodusentenes samarbeidsråd Sigurd Sylling.
I tillegg må bøndene betale meir for varer dei treng.
– Diesel, gjødsel, plast, jordbærplantar. Alt mogleg har auka i pris, seier jordbærbonde i Byrge Kalvehagen i Grimstad.