Åtvarar båteigarar: – Det er fare for store skadar – NRK Sørlandet

Hopp til innhold

– Det er rett og slett fare for store skadar på båtane viss dei blir ståande slik, seier medievakt i Redningsselskapet Markus Plementas.

Sidan nyttår har det herja eit kraftig snøvêr på Sørlandet.

Torsdag morgon oppdaga båtforeininga i Lyngdal omfattande ising på fleire av båtane i hamna.

Ismengdene hadde mellom anna søkke ein båt delvis, slik at sjølvlensinga kom under vatn.

– Eg vil tru det er fleire som har desse problema rundt omkring med dei låge temperaturane og vinden me har no, seier leiar Roger Bordvik i Lyngdal Båtforening.

Redningsselskapet ber no båteigarar om å sjekke og fjerne is frå båtane sine.

Kan vere farleg

Det kan vere ei omfattande oppgåve å fjerne is på glatte bryggjer og båtar. Plementas fortel at ein burde ta forholdsreglar viss ein skal ut til båten.

– Ein bør få fjerna isen og snøen på ein så forsvarleg måte som mogleg. Det inneber farar å skulla få isen av båtane.

Redningsselskapets tips til avising av båten

Markus Plamentas i Redningsselskapet har følgjande tips til deg som skal skrapa båten:

Ta på deg redningsvest før du går ut på bryggja.

– Ein kan skli på kaien hamna i vatnet. Ta på deg vest og kle deg godt for oppgåva, seier Plementas.

Gjer det i dagslys

– Det blir vanskelegare og farlegare å rydda båten for is og snø når det er mørkt.

Få hjelp av ein venn

– Det er større risiko viss ein gjer dette åleine. Viss ein kan ta med seg nokon for å hjelpa er det ein god tryggleik. Gjer ein det likevel åleine så si frå kvar du er og når du reknar med å vera tilbake.

Viss ein hamnar i vatnet

– Då er det viktig å få kontroll på situasjonen og å komma seg opp av vatnet igjen. Få kontroll på pusten og ikkje få panikk.

Han seier at dei fleste som har båtane sine ute om dagen vil oppleve ising.

– Det er slik vêret er. Det er heilt vanleg med sprengkulda.

Har ute farevarsel

Meteorologisk institutt har ute eit gult farevarsel for ising på skip langs kysten av Agder og sør i Rogaland. Same farevarsel gjeld for kyst- og fjordstrøk i Finnmark.

Vakthavande meteorolog Håkon Mjelstad fortel at dei vil forlengja farevarselet i sør til laurdag morgon.

– Det er typisk sånn det blir når det er kaldt og det i tillegg er frisk bris eller meir. Då kan sjøsprøyt blåse opp og fryse på båtar, seier Mjelstad.

Folk har vore uheldige

Hos If forsikring har dei allereie fått inn nokre meldingar frå folk som har vore uheldige med båten.

– Me har fått inn nokre skadar på båtar som har sokke under vekta frå snøen, som har komme dei siste dagane, seier kommunikasjonssjef Sigmund Clementz.