Det er ikkje mange som veit at det var ein sørlending som sette fart på yoghurt-suksessen.
Men Leif Grøsfjell er altså mannen som har skrive seg inn i historiebøkene når det gjeld norsk meieritradisjon. Han har gjort det same for yoghurten, som Henry Ford gjorde for bilen.
- Les også:
– Ingen var dumme nok
Leif byrja i meieribransjen i Kristiansand på 50-talet. På den tida var masseproduksjon av yoghurt umogleg, og nærast for eit spesialhandverk å rekne.
Problemet var at yoghurten skilte seg då den kom i store tankar.
Men under ein fisketur på Helleland på 50-talet kom Grøsfjell på det geniale.
– Plutseleg kom det ein idé. Eg måtte køyre yoghurten gjennom ei sil, før eg kjølte den ned. Først pumpe den frå den varme tanken på 42 grader, så igjennom sila, så inn på ein tank for kjøling, for til slutt å tappe den.
– Kvifor var det ingen som hadde kome på det før?
– Det var vel ingen som var dumme nok.
Og på den måten var problemet løyst, og meieria produserte yoghurt i store mengder.
Går under namnet Mr. Yoghurt
Tine Meieriet i Kristiansand feirar denne veka 50-årsjubileum. Bedrifta har 100 tilsetje, 350 leverandørar og produserer mjølkeprodukt av mange slag.
Grøsfjell som slutta for 19 år sidan har ein spesiell plass i meieriet.
– Leif har vore viktig, og har ei stor rolle i norsk meieritradisjon. Her på huset kallar vi han Mr. Yoghurt! Det er fordi han har dratt yoghurten frå handverk til industriell produksjon, og funne opp lure løysingar, seier Tom Midtbø Dahl hos Tine.