– Det var ein utruleg tung dag mot Nøtterøy, og måten vi tapte på gjorde det endå tyngre. Eg kjende ikkje att spelarane på nokon punkt. Alt mangla i den kampen, seier Kurtovic til NRK.
– «Attityden» mangla fullstendig. Den må tilbake for at vi skal slå Lillestrøm, seier han.
- Les også: ØIF har fått ny daglig leder
På tredjeplass
Kampen mot Nøtterøy var den første etter VM-pausen. Vestfoldklubben vann til slutt 30-21 mot arendalittane.
Sportsleg leiar Per Carsten Michelsen sa til NRK etter kampen at det såg ut som at spelarane framleis var på ferie.
Nokre få dagar seinare vann både Haslum og Bodø. Det gjer at ØIF er dytta ned til 3. plass på tabellen med ein kamp mindre spelt.
– Vi har snakka saman og vi har hatt ei fantastisk treningsveke og samla oss. Eg er sikker på at vi slår tilbake mot Lillestrøm, seier han.
- Les også: ØIF-treneren slutter
Vil ikkje snakke om gull
Men Kurtovic er klar på at det ikkje vert enkelt å møte tabelljumboen frå Romerike.
– Det er eit godt lag som har skapt problem for mange lag med sitt offensive forsvar. I serien og i cupen slo vi dei greit. Vi løyste det enkelt og var einige om korleis vi skulle spele, seier Kurtovic, som ikkje vil ha noko snakk om seriegull.
– Eg ser at mediene er opptekne av gull, men eg er oppteken av neste kamp, seier han.
På søndagens oppgjer mot Lillestrøm vert det truleg fulle tribunar. To av sponsorane til klubben har betalt for 2500 billettar. Det betyr gratis inngang for publikum.
– Det er imponerande at sponsorane gjer dette. Viss ikkje publikum forstår alvoret og ikkje kjem på kamp, så veit eg ikkje heilt kva som skal til. Men eg er sikker på at det vert bra trøkk mot Lillestrøm, seier trenaren.