To av sponsorane til klubben har betalt for 2500 billettar til eliteserieoppgjeret. Det betyr smekkfull hall.
– Det blir stinn brakke. Vi hadde nok fått mykje folk uansett, men dei to største sponsorane våre ynskjer å spandere dett på publikum som var med på å heie i cupfinalen, seier sportsleg leiar Per Carsten Michelsen til NRK.
Sportsleg leiar Per Carsten Michelsen.
Foto: Liv Eva Welhaven Løchen/NRKØIF Arendal slo Bodø i cupfinalen i desember med over sørlendingar på tribuna i Oslo spektrum.
Først til mølla
Det er Sparebanken Sør og Norac/Adax som opnar pengeboka og betalar for alle som vil sjå kampen.
– Det er først til mølla. Vi skal sørge for at dei som har sesongkort kjem inn, men dei må nok vere i hallen ein halvtime før kampstart, seier han.
Serieleiar ØIF Arendal fekk ein tøff start på vårsesongen då dei tapte borte mot Nøtterøy søndag. Etter kampen sa Michelsen at det såg ut som at ein del spelarar framleis var på ferie.
No håpar han at laget løftar seg og slår tilbake mot Lillestrøm.
Drøymer om gull
– Det var kanskje litt stygt å seie at dei var på ferie, men det var ingen god kamp. Vi kan ikkje leve med to slike kampar på rad, seier han.
Michelsen meiner at Lillestrøm må slåast dersom klubben skal halde liv i gulldraumen. No håpar han på hjelp frå publikum.
– Det har vist seg å spele ei viktig rolle tidlegare. Vi har eit veldig entusiastisk publikum. På gode dagar er det ingen som overgår dei i Norge, seier han.
