Saman med fire andre nordmenn jobbar sørlendingen for FN på Haiti. I nær 30 timar søkte nordmennene tilflukt i eit murhus i hovudstaden Port-au-Prince.
– Eg har ikkje vore redd, men eg har vore spent. Vi har veldig godt utstyr, solide bilar, eit solid hus og bur i høgda, seier Eriksen til NRK.
Han har endå ikkje sett skadeomfanget med eigne auge etter orkanen som har kravd minst 11 liv. Men han har fått opplyst at det er snakk om store skader, først og fremst på grunn av store nedbørsmengde.
– Slumområda hardast ramma
– Det bekymra meg før orkanen kom. Det er veldig stor fattigdom i landet. Dei hadde eit jordskjelv for seks år sidan og stadig naturkatastrofar. Vi veit at det er dei fattige det går utover og det har det gjort igjen, seier Eriksen.
– Her er det hovudsakleg flaum som har skapt problem. Det er slumområda som er hardast ramma. Det er sjølvsagt trist å tenke på at det er dei fattige som har fått den verste støyten igjen, seier han.
Hovudstaden vart ikkje hardast ramma. Dei sørlegaste delen som har fått størst skader etter orkanen. Han fortel om dårleg infrastruktur i landet, som no er ytterlegare svekka.
– Uvêret har øydelagt vegar som gjer hjelpearbeidet vanskeleg, seier han.
Sikkerheitsoppdrag utsett
Skulane er stengde etter herjingane. Men det verste er over.
– Det er heilt vindstille og overskya. Det er meldt regn. Sakte men sikkert byrjar folk å komme ut. Då eg køyrde til jobb var det merkverdig lite trafikk.
Onsdag skulle Eriksen og kollegaene ha reist til ein by nord i landet for å hjelpe til med sikkerheit under presidentvalet søndag. Dette er no utsett.
– Vi ventar på kva som skal skje og om vi heller skal hjelpe til i oppryddingsarbeidet. Om det er behov er vi klar, seier han.