– Du tømmer sentrum for funksjonar. Det blir mindre attraktivt å vere i senteret, og du kan etter kvart få eit dødt sentrum, seier Jørgen Amdam som er professor i samfunnsplanlegging ved Høgskulen i Volda.
I går heldt Arbeidarpartiet folkemøte om Førde kommune sine planar om handelspark på 70.000 kvadratmeter på Brulandsvellene, utanfor Førde sentrum. Professoren malte eit dystert bilete av framtida for sentrum dersom handelsparken vert bygd.
– Det er store utfordringar med å få nye aktivitetar inn. Ein greier det i større område som Ålesund, men eg fryktar det ikkje vil skje her i Førde, seier Amdam.
- Les også:
Konkurranse eller ikkje?
Brulandsvellene vil bli ein av landets største handelsparkar. Målet er vekst, fleire arbeidsplassar og meir trivsel i byen. Berre store ting som kvitevarer og møblar skal seljast på Brulandsvellene.
Johan Magerøy, som representerer næringsinteressene i sentrum, trur ikkje slike avgrensingar vil vere nok, og at butikkdød i sentrum blir resultatet.
– Kommunen klarar ikkje å avgrense kva som kjem i butikkane der oppe viss dei opnar for detaljhandel. Då får du konkurranse mot sentrum, og store aktørar på Brulandsvellene vil fort kunne konkurrere ut ein del butikkar i sentrum.
- Les også:
Arild Meisterplass, styreleder i Citus AS, som vil bygge ut på Brulandsvellene, seier dei vil satse på sentrum, og at storbutikkane i handelsparken ikkje vil bli ein trussel.
– Me snakkar om to forskjellige type handel. I sentrum vil det vere mindre butikkar. Men dei store konsepta er ikkje eigna i sentrum, og ønsker ikkje å vere i sentrum. Vi må også legge til rette for dei.
Kan handelsparken stogge handelslekkasjen?
Mange reiser i dag til store kjøpesenter og butikkar i Bergen. Meisterplass trur handelsparken kan bremse handelslekkasjen.
– Fleire og fleire besøker desse populære konsepta utanfor fylket vårt. Har vi tilbod her, er det ikkje grunn til å reise til Bergen.
Professor Amdam trur derimot ikkje at handelsparken vil stoppe folk frå å reise til storbyane for å kjøpe ting.
– Tilbodet vil uansett vere større og breiare i Ålesund, og spesielt i Bergen, enn det dei greier å få til her i Førde.
Om ein til to månadar skal bystyret i Førde avgjere om det blir handelspark på Brulandsvellene.
- Les også: