- OPPDATERT: Jon Rolf Skamo Hope vart dobbelt norgesmeister då han også vann 10 km klassisk.
Glopparen fekk full klaff på fredagens 15 kilometer friteknikk under junior-NM i Harstad, og gjekk inn til sin aller første NM-medalje.
I mål var Jon Rolf Skamo Hope 5,4 sekund raskare enn sølvmedaljevinnar Vebjørn Hegdal (Larvik Ski).
– Eg er strålande nøgd. Det er ei utruleg lette å kjenne at treningsopplegget fungerer, at kroppen responderer godt og at eg tek nye steg år for år, seier han til NRK.
Hadde full kontroll
GULLSMAK: Tidlegare i vinter vart Jon Rolf Skamo Hope den første sidan Odd-Bjørn Hjelmeset i 1991 som sikra fylket gull i junior-VM. I dag vart det NM-gull. – Eg har eitt år att som eldre junior, så det var utruleg morosamt å få full klaff på det lengste løpet for sesongen, seier hyaren.
Foto: PrivatI konkurranse med eitt år eldre løparar, forstod Skamo Hope tidleg at gullmedaljen låg så godt som i lomma. Som siste startande kunne han gå på tidene til konkurrentane, og allereie etter ein kilometer var avstanden fem sekund til neste mann.
– Med løpet i morgon i bakhovudet, sparte eg litt på kreftene og kanskje vart litt defensiv. Då avstanden minka til seks sekund måtte eg opp att med tempoet, seier han.
– Det hadde vore litt dumt å mista sigeren på eige grep, men eg hadde god sekundering og gode ski, legg hyaren til.
Går for nytt gull
Neste utfordring i junior-NM er klassisk distanserenn laurdag, den stilarten Skamo Hope er sterkast i.
– Eg var kanskje best i friteknikk for nokre år sidan, men som junior har eg hevda meg best i klassisk. Då er det herleg å få til eit skikkeleg godt skøyteløp, og vise at eg er god i begge stilartar, seier løparen som tidlegare i vinter var på laget som tok gull på stafett under junior-VM i USA.
– Og kor høgt legg du lista for morgondagen?
– Eg går for pallen, og sjølvsagt førsteplassen. Det hadde vore moro å bli dobbelt noregsmeister.
Andre lokale utøvarar
Det har vore fleire løparar frå fylket på start i junior-NM. I klassen for 17 åringar vart Simon Hjelmeset Kirkeeide nummer ni på 10 kilometer friteknikk.
Blant 18-åringane var Andreas Hetle (Breimsbygda) lenge med i medaljekampen, men eit fall mot slutten viste han til sjuandeplass. Vetle Uhre Hammersvik (Førde) tok plassen rett bak.
Alle resultat finn du her (ekstern lenke).
