NRK Meny
Normal

Eitt år sidan terrorangrepet - no er han tilbake i Boston for å springe maraton

Eitt år etter terrorangrepet under Boston Maraton er Terje Lyngstad tilbake i byen. Han var aldri i tvil om at han skulle springe maraton her igjen.

Terje Lyngstad

TILBAKE: Terje Lyngstad frå Førde tykkjer det er godt å vere tilbake i Boston. Her har han henta startnummeret sitt.

Foto: Veslemøy Lyngstad

Stemninga i byen er elektrisk, store mengder løparar og familie og vener med draumar og forventningar, og mange tankar rundt hendingane i fjor. Boston Strong!

Terje Lyngstad på Facebook

– Det er faktisk meir truleg at eg ikkje hadde reist bort hadde det ikkje vore for bombene i fjor. Men no er vi mange som vil vise at ingenting kan stoppe Boston Maraton, fortel Terje Lyngstad frå Førde dagen før sjølve løpet.

Det var 15. april i fjor at to bomber eksploderte mellom publikum som hadde samla seg ved mållinja. Boston-bombene er det verste terrorangrepet i USA sidan 11. september 2001. Bombene tok tre liv og 264 menneske blei skadd. To brør blei arresterte, mistenkte for å stå bak angrepet.

Forlèt området sju minutt før bombene small

For å få vere med på Boston Maraton må ein vere kvalifisert. Terje Lyngstad hadde så bra kvalifiseringstid i fjor at han hamna i den første puljen. Difor hadde han kome i mål då bombene small.

– Vi forlèt vel målområdet om lag sju minutt før eksplosjonen. Hadde eg vore i ei seinare pulje, hadde eg vore ein heilt stad då bombene gjekk av. Det var som ein kjede av flaks, fortel han.

(Artikkelen held fram under biletet)

Terje Lyngstad gjekk i mål kort tid før dei to eksplosjonane i målområdet ved Boston Maraton

LIKE VED: Terje Lyngstad etter målgang i Boston maraton. Kort tid seinare small det to gonger i målområdet.

Foto: Montasje: Privat/Charles Krupa/Ap

– There is no finish line

No har Lyngstad vore tre dagar i Boston saman med borna sine. Han seier det er mykje folk der mållinja er og at folk snakkar i lag.

– Det er rekordmange som deltek i år. I fjor var det om lag 20.000 som ikkje fekk fullføre løpet på grunn av bombene. Dei som ville, har fått ein ny sjanse i år.

Han trur mange av dei ser fram til å krysse mållinja i år.

– I fjor blei mange møtt med: There is no finish line. Det var heilt kaos, seier han.

Mykje meir politi i gatene

Terje Lyngstad

BOSTON STRONG: Etter terroren i fjor blei slagordet Boston Strong laga. Dette kan ein sjå over heile byen. Terje Lyngstad seier det er ei spesiell stemning i byen dette året.

Foto: Veslemøy Lyngstad

Den erfarne maratonløparen frå Førde merkar at det er auka tryggleik i år. Det er mykje meir synleg politiet i gatene og han ser spesialstyrkar passe på løparen som skal springe 42 kilometer gjennom åtte bydelar.

– Politiet er veldig til stades. Det er også ein del skanning, som til dømes der vi hentar startnummera. Alt vi skal ha med på løpsdagen må vi ha i gjennomsiktige plastposar. Vi kan også risikerer å bli kroppsvisitert, så det er veldig strengt.

Tilbake i Boston fortel Lyngstad at det er spesielt å vere tilbake i den amerikanske storbyen.

– Det er noko heilt spesielt med å vere med på Boston Maraton, det er verdas eldste løp. Maratonet blir alltid arrangert den tredje måndag i april, på Patriots Day som er til minne om frigjeringa frå britane.

Skal springe sitt 75. maraton

Klokka ti lokal tid går startskotet i morgon. Terje Lyngstad har så bra kvalifiseringstid at han får starta langt framme i år også.

– Eg kan nesten ta på verdas beste løparar. Dette blir mitt 75. maraton og eg satsar på å komme i mål på 2:50. Det er meldt eit fantastisk ver og eg gler meg veldig, seier han.

Vegopning på Bergum i Førde kommune